ജൈവ യുദ്ധങ്ങൾ നൂറ്റാണ്ടുകളിലൂടെ...

2001 സെപ്റ്റംബർ 11 നാണ് അമേരിക്കയെ നടുക്കിയ വേൾഡ് ട്രേഡ് സെന്റർ, പെന്റഗൺ ആക്രമണങ്ങൾ നടന്നത്. അതിനു തൊട്ടു പിന്നാലെ അമേരിക്കയെ ഭീതിയുടെ മുൾമുനയിൽ നിർത്തിയ മറ്റൊരു സംഭവം ഉണ്ടായി. അമേരിക്കൻ ധാർഷ്ട്യത്തിന് എതിരായി പ്രഖ്യാപിക്കപ്പെട്ട, കഴിഞ്ഞ അര നൂറ്റാണ്ടിലെ ഏറ്റവും പ്രധാനപ്പെട്ട ഒരു ജൈവ യുദ്ധമായിരുന്നു ( Bio Warfare) അത്. തപാൽപ്പെട്ടികളിലൂടെ സഞ്ചരിച്ച ഒരു അദൃശ്യ യുദ്ധം.

ട്രേഡ് സെന്റർ ചാരക്കൂമ്പാരമായി പതിച്ച് കൃത്യം ഒരാഴ്ച്ച കഴിഞ്ഞ്, സെപ്റ്റംബർ 18 നും, ഒക്ടോബർ 9 നും ന്യൂയോർക്ക് സിറ്റിയിലേക്കും ഫ്ലോറിഡയിലേക്കും എട്ട് കത്തുകൾ മെയിൽ ചെയ്യപ്പെടുന്നതിൽ നിന്നാണ് സംഭവങ്ങളുടെ തുടക്കം.
അവയിൽ രണ്ടെണ്ണം യു എസ് ഡെമോക്രാറ്റിക് സെനറ്റർമാർക്കും, മറ്റുള്ളവ പ്രമുഖ പത്ര വാർത്താ സ്ഥാപനങ്ങൾക്കുമാണ് മെയിൽ ചെയ്യപ്പെട്ടത്. ആന്ത്രാക്സ് പൊടി വിതറിയ കത്തുകളായിരുന്നു അവ. അമേരിക്കയ്ക്കു മേൽ അദൃശ്യ ശക്തികളുടെ ഒരു രണ്ടാം ഘട്ട യുദ്ദമായിരുന്നു ഇത്. ജൈവയുദ്ധം (Biological Warfare) എന്ന് ശസ്ത്രം പേരിട്ട വിസിബിലിറ്റിയില്ലാത്ത / അഗോചരമായ ഒരു യുദ്ദപ്രഖ്യാപനം.

സെപ്റ്റംബർ 18 ന് അയക്കപ്പെട്ട ആദ്യത്തെ ആറ് കത്തുകൾ യഥാക്രമം, ന്യൂയോർക്ക് മഹാനഗരത്തിലെ ABC News, CBS News, NBC News, New York Post എന്നിവയ്ക്കും, ഫ്ലോറിഡയിലെ National Enquirer at American Media എന്നിവയുടെ ഓഫീസിലേക്കുമാണ് പോസ്റ്റ് ചെയ്യപ്പെട്ടത്. മാരക രോഗമായ ആന്ത്രാക്സ് പരത്തുന്ന രോഗാണുക്കളെ അതിവിദഗ്ദമായി ഉള്ളടക്കം ചെയ്തിരുന്ന കത്തുകൾ. അഞ്ച് പേർ ഈ സംഭവത്തിൽ കൊല്ലപ്പെട്ടു. 17 പേർക്ക് രോഗം സ്ഥിരീകരിക്കപ്പെട്ടു. റോബർട്ട് സ്റ്റീവൻസ് എന്നയാളാണ് കത്തിലൂടെ ആന്ത്രാക്സ് ബാധിച്ച് മരിച്ച ആദ്യ വ്യക്തി. ചർദ്ദിയും തളർച്ചയുമായി ഹോസ്പിറ്റലിൽ പ്രവേശിക്കപ്പെട്ട ഇയാൾ ഒക്ടോബർ അഞ്ചിന് അന്തരിച്ചു. ന്യൂയോർക്ക് പോസ്റ്റും NBC ന്യൂസും, തങ്ങൾക്ക് വന്ന ലെറ്ററുകൾ പിന്നീട് കണ്ടെത്തി. ABC News, CBS News, അമേരിക്കൻ മീഡിയ എന്നിവയ്ക്ക് വന്ന കത്തുകൾ കൈപ്പറ്റിയ അവരുടെ സ്റ്റാഫുകൾക്ക് ആന്ത്രാക്സ് രോഗം സ്തിരീകരിച്ചു.

ഒക്ടോബർ 9 ന് വീണ്ടും രണ്ടു കത്തുകൾ കൂടി മെയിൽ ചെയ്യപ്പെട്ടു. ഈ കത്തുകൾ സെനറ്റർമാരായ Tom Daschle, Patrick Leahy എന്നിവർക്ക് ലഭിച്ചതോടെയാണ് കത്തുകളിൽ ആന്ത്രാക്സ് വൈറസ് അടങ്ങിയിട്ടുണ്ട് എന്ന് സ്ഥിരീകരിക്കപ്പെട്ടത്. അതോടെ അമേരിക്കൻ ഗവണ്മെന്റ്, പോസ്റ്റൽ സേവനങ്ങൾ ഷട്ട് ഡൗൺ ചെയ്തു. FBI അന്വേഷണം ഏറ്റെടുത്തു. അമേരിന്ത്രാക്സ് (Amerithrax) എന്ന് പേരിട്ട ഈ ഇന്വെസ്റ്റിഗേഷൻ, അമേരിക്കൻ നിയമപാലന ചരിത്രത്തിലെ ഏറ്റവും സങ്കീർണ്ണമായ ഒരു കേസായി പിന്നീട് മാറി.

സെനറ്റർ Tom Daschle, ഗ്രെന്റ് ലെസ്സി എന്ന തന്റെ സഹായി മുഖാന്തിരം കത്ത് തുറന്നു. സെനറ്റർ Patrick Leahy യ്ക്ക് അയക്കപ്പെട്ട കത്ത് തപാൽ കോഡ് തെറ്റിയതിനാൽ മറ്റൊരിടത്ത് എത്തപ്പെട്ട നിലയിൽ പിന്നീട് കണ്ടെത്തി. പ്രസ്ഥുത കത്ത് വിർജീനിയയിലേക്ക് പോകുകയും, തപാൽ വകുപ്പ് ഉദ്ധ്യോഗസ്ഥനായ ഡേവിഡ് ഹോസ് എന്നയാൾക്ക് അന്ത്രാക്സ് ബാധിക്കുകയും ചെയ്തു. കത്തുകള്‍ തുടര്‍ക്കഥയായതോടെ അമേരിക്കയിലെങ്ങും ഒരു ആന്ത്രാക്സ് ഭീതി നിഴൽ വിരിച്ചു.

2001 ൽ ആരംഭിച്ച ഈ കേസന്വേഷണം, 2010 ഫെബ്രുവരി 19 ന് FBI ക്ലോസ് ചെയ്തു. ഡോ. ബ്രൂസ് ഇവന്‍സ് (Bruce Ivins) എന്ന അമേരിക്കൻ ശാസ്ത്രജ്ഞനെ മാത്രമാണ് എഫ്‌ബിഐ പ്രതിസ്ഥാനത്ത് ചേര്‍ത്തിരുന്നത്. മാനസീക വിഭ്രാന്തിയുള്ള ഗവേഷക ശാസ്ത്രജ്ഞനാണ് ഇവിന്‍സ്. (???) ഇവിന്‍സിനെതിരെ കുറ്റം ചുമത്താന്‍ പ്രോസിക്യൂട്ടര്‍മാര്‍ തയ്യാറെടുക്കവേ, 2009 ൽ അദ്ദേഹം സ്വയം ജീവനൊടുക്കി. അതിനു മുൻപ് ജൈവായുധ വിദഗ്ധന്‍ സ്റ്റീവന്‍ ഹാറ്റ്ഫിലിനെതിരെ (Steven Hatfill) കേസെടുക്കാനും FBI നീക്കം നടത്തിയിരുന്നു. പല പഴുതുകളും ഗൌരവത്തോടെ എടുക്കാതെയാണ് എഫ്‌ബിഐ കുറ്റാന്വേഷണം നടത്തിയതെന്ന വിമർശനം വന്ന കേസ് ആയിരുന്നു ഇത്. ഒരർഥത്തിൽ FBI യ്ക്ക് വിജയിക്കാൻ കഴിയാതിരുന്ന കേസും.

ജൈവായുധങ്ങൾ (Biological Weapons)
_______________________________

ജൈവ ആയുധങ്ങൾ ഒരു ആധുനിക പ്രതിഭാസമാണ് തോന്നാം. എന്നാൽ വളരെ കാലപ്പഴക്കം ചെന്നതും, ഭയാനകവുമായ ഒരു ചരിത്രം അവയ്ക്കുണ്ട്. ബയോളജിക്കൽ വെപ്പണുകൾക്കെതിരേയുള്ള അമേരിക്കൻ പ്രതിരോധ ആസ്ഥാനമായ
യു.എസ് ആർമി മെഡിക്കൽ റിസർച്ച് ഇൻസ്റ്റിറ്റ്യൂട്ട് (U.S. Army Medical Research Institute of Infectious Diseases) നടത്തിയ "ജൈവ യുദ്ധങ്ങളുടെ ചരിത്ര പശ്ചാത്തലം" എന്ന പഠനത്തിൽ, സാംക്രമിക രോഗങ്ങൾ എങ്ങനെ യുദ്ധ വിജയങ്ങൾക്ക് വേണ്ടി ഉപയോഗിക്കപ്പെടുന്നു എന്ന് ചൂണ്ടിക്കാണിച്ചു തരുന്നുണ്ട്. ഫലപ്രഥമായൊരു പ്രധിരോധം മുൻ കൂട്ടി ചെയ്യാൻ സാധ്യമല്ലാത്ത ഒന്നാണ് ജൈവായുധങ്ങൾ. ജൈവായുധങ്ങൾ അദൃശ്യമാണ്. അവയുടെ ഫലം പ്രവചനങ്ങൾക്ക് അസാധ്യമാണ്. ചിലപ്പോൾ താരതമ്യേന വളരെ വേഗത്തിലോ, ചിലപ്പോൾ വളരെ സാവധാനമോ അവയുടെ പ്രത്യാഘാതങ്ങളുണ്ടാകാം.

ഒരു Bio Warfare ഇരകളുടെ എണ്ണത്തിന്റെ വ്യാപ്തി കൂട്ടും. രോഗം മരണം എന്നിവ കൂടാതെ ഭയം, പരിഭ്രാന്തി, അരക്ഷിതാവസ്ഥ എന്നിവ ജനങ്ങൾക്ക് മേൽ ഉളവാകും. ഒപ്പം, സർവ മേഖലയിലും മരവിപ്പിക്കുന്ന ഒരു അനിശ്ചിതത്വം സൃഷ്ടിക്കപ്പെടും. ജൈവ യുദ്ദങ്ങളുടെ പ്രധാന ലക്ഷ്യമെന്നു പറയുന്നത്, രാഷ്ട്രത്തിന്റെ സാമൂഹിക-സാമ്പത്തിക പ്രവർത്തനങ്ങളെ തടസ്സപ്പെടുത്തുക, ഗവണ്മെന്റ് -അധികാരം എന്നിവയെ സമ്മർദ്ദത്തിലാഴ്ത്തുക, സൈനിക പ്രതികരണങ്ങൾ മരവിപ്പിക്കുക തുടങ്ങിയവയാണ്. ഒരു യുദ്ധത്തിൽ ശത്രുവിനെ, വളരെ എളുപ്പത്തിൽ പരാജയപ്പെടുത്താൻ ജൈവാക്രമണങ്ങൾ കൊണ്ട് നിഷ്പ്രയാസം സാധിക്കുന്നു.

അമേരിക്കയ്ക്ക് മേൽ നിഴൽ വിരിച്ച ആന്ത്രാക്സ് യുദ്ധഭീതിയെക്കുറിച്ചായിരുന്നു ഈ ലേഖനത്തിന്റെ തുടക്കം. എന്നാൽ നിലവിൽ ഏറ്റവുമധികം രാസ - ജൈവായുധങ്ങൾ ഡെവലപ്പ് ചെയ്യുകയും, ഇപ്പോഴും ലാബോറട്ടറികളിൽ സൂക്ഷിക്കുകയും ചെയ്യുന്ന ഒരു പ്രധാന രാജ്യമാണ് അമേരിക്ക. വിയറ്റ്നാമിലും, ഇറാഖിലുമൊക്കെ അവർ അതിന്റെ സാമ്പിളുകൾ ഭീതിദമായ രീതിയിൽ പരീക്ഷിക്കുകയും ചെയ്തതാണ്. അതിനാൽ തന്നെ കൊടുത്താൽ കൊല്ലത്തും കിട്ടും എന്ന വാചകത്തെ അന്വർത്ഥിക്കുന്ന ഒന്നായിരുന്നു അമേരിക്കയ്ക്ക് 2001 ൽ ലഭിച്ച ആന്ത്രാക്സ് ലെറ്ററുകൾ.

ഒരേ സമയം തന്നെ ബയോളജിക്കൽ വെപ്പണുകളുടെ ഇരയായ ചരിത്രവും, മറ്റുള്ളവരെ അതിന് ഇരയാക്കിയ ചരിത്രവും കൂടെ കൊണ്ടു നടക്കുന്നവരാണ് അമേരിക്ക എന്നും കൂടി നാം അറിഞ്ഞിരിക്കേണ്ടതുണ്ട്. ബയോളജിക്കൽ വെപ്പണുകളേക്കുറിച്ചുള്ള പഠനത്തിൽ അത് ഏറ്റവുമധികം ഉപയോഗിച്ചിട്ടുള്ളത് ബ്രിട്ടനും, അമേരിക്കയുമാണെന്ന് കാണാം. വാസ്തവത്തിൽ , ബ്രിട്ടൺ തങ്ങളുടെ വൈരികളെ കൊല്ലാൻ വസൂരി എന്ന ആശയം ഉപയോഗിച്ച ആദ്യത്തെ രാഷ്ട്രം ആയിരുന്നു. 18-ആം നൂറ്റാണ്ടിൽ, 1754 - 1763 വരെയുള്ള കാലത്ത്, ഇൻഡ്യയിലും കാനഡയിലുമായി നടന്ന യുദ്ദങ്ങളിൽ ബ്രിട്ടനും ഫ്രാൻസും വ്യാപകമായി വസൂരി കെട്ടഴിച്ചു വിട്ടിരുന്നു.

പ്ലേഗും, വസൂരിയും, കോളറയും യുദ്ധ തന്ത്രമായതെങ്ങനെ?
____________________________________________

പതിനാലാം നൂറ്റാണ്ടിൽ കാഫ്ഫാ (*1) ആക്രമണ സമയത്ത്, ശത്രുക്കളായ തതാരി സൈന്യം, കഫാ നഗരത്തിൽ ബുബോണിക് പ്ലേഗ് (Bubonic Plague) ബാധിച്ചു മരിച്ച തങ്ങളുടെ സൈനികരെ കൂട്ടമായി കൊണ്ടു തള്ളുകയും, അതിനെ തുടർന്ന് യൂറോപ്പിൽ പ്ലേഗ് ബാധിക്കുകയും ചെയ്തതാണ് ചരിത്രത്തിലെ ആദ്യത്തെ പ്രത്യക്ഷമായ, ബയോളജിക്കൽ യുദ്ധ തന്ത്രം.

1763 -ൽ പോണ്ടിയാക്ക് (*2) യുദ്ദസമയത്ത്, വടക്കേ അമേരിക്കയിലെ ബ്രിട്ടീഷ് സൈന്യത്തിന്റെ കമാൻഡർ-ഇൻ-ചീഫ്: സർ ജെഫ്രി ആംഹെർസ്റ്റ്, കേണൽ ഹെൻറി ബൊക്കെയ്ക്ക് (Henry Bouquet) എഴുതി:-
"ഇന്ത്യക്കാരുടെ ഇടയിൽ ഭംഗിയായി വസൂരി (Smallpox) അയയ്ക്കാൻ കഴിഞ്ഞതു പോലെ, വടക്കേ അമേരിക്കൻ ഗോത്രങ്ങൾക്കിടയിലും അവരെ നശിപ്പിക്കാൻ നമ്മുടെ അതേ തന്ത്രം തന്നെ പ്രയോഗിക്കണം."
ഇതിന് കേണൽ ജഫ്രി ആംഹെർസ്റ്റ് എഴുതിയ മറുപടി മറുപടി ഇതാണ്: -
"ഞാൻ അവർക്ക് നമ്മുടെ പക്കലുണ്ടായിരുന്ന, സാംക്രമിക രോഗികളുടെ കമ്പിളിപ്പുതപ്പുകൾ നൽകി കഴിഞ്ഞു. രോഗം എന്നെത്തന്നെ കീഴ്പ്പെടുത്താതിരിക്കാൻ അതീവ ശ്രദ്ദ ചെലുത്തേണ്ടതുണ്ട്. വസൂരി അമേരിക്കൻ സ്വദേശികളുടെ സംഖ്യ കുറച്ചുകൊണ്ടിരിക്കുന്നു. ഈ രോഗം മുൻപ് ഉണ്ടായിട്ടില്ലാത്തത് കൊണ്ട് അവർക്ക് പ്രധിരോധ ശേഷി ഉണ്ടാവുകയില്ല. പ്രധിരോധ മരുന്നുന്നുകളും നിലവിൽ ലഭ്യമല്ല."
ചരിത്രത്തിൽ വസൂരി എന്ന മഹാ വിപത്തിനെ ബ്രിട്ടൻ എത്രമേൽ ഭീകരമായാണ് ഉപയോഗിച്ചതെന്നതിന്റെ ഏറ്റവും വലിയ തെളിവുകളിലൊന്നാണീ കത്തുകൾ.

1775-83 ലെ അമേരിക്കൻ റെവല്യൂഷണറി വാർ സമയത്ത് പല പകർച്ച വ്യാധികളും ഒരു ആയുധമായി ഉപയോഗിക്കപ്പെട്ടിരുന്നു. 1775-76 ശീതകാലത്ത് , അമേരിക്കൻ ശക്തികൾ ബ്രിട്ടീഷ് നിയന്ത്രണത്തിൽ നിന്നും, കാനഡയിലെ ഫ്രെഞ്ച് സ്പീക്കിങ് പ്രൊവിൻസ് ആയ ക്വീബെക് (Quebec) മോചിപ്പിക്കാൻ ശ്രമിക്കുമ്പോൾ, ബ്രിട്ടീഷ് സേനയുടെ കമാൻഡർ, അമേരിക്കൻ സൈനികർക്കെതിരേ ഷുദ്രകരങ്ങളായ രോഗാണുക്കളെ സന്നിവേശിപ്പിക്കുകയുണ്ടായി. ഏതാനും ആഴ്ചകൾക്കുശേഷം പകർച്ചവ്യാധിയാൽ പതിനായിരക്കണക്കിന് അമേരിക്കൻ പോരാളികൾ കൊല്ലപ്പെട്ടു.

1941-ൽ ജപ്പാൻ നടത്തിയ ചൈന അധിനിവേശകാലത്ത് നടന്ന സംഭവം ഇരുപതാം നൂറ്റാണ്ടിലെ ബയോ വാർഫെയറുകളിൽ പ്രധാനപ്പെട്ട ഒന്നാണ്. ചൈനയിലെ അധിനിവേശ പ്രദേശത്ത് ജാപ്പനീസ് സയന്റിസ്റ്റുകളും, സ്റ്റാഫുകളും ഉൾപ്പെടെ 3000 ഓളം ആളുകൾ ജൈവ ആയുധ പദ്ദതിക്കായി ചിലവഴിക്കുമ്പോൾ, ഒരു സാങ്കേതിക പാളിച്ച ഉണ്ടാവുകയും 1,700 ജാപ്പനീസുകാരും, തടവുകാരായ 10000 ചൈനീസ് സൈനീകരും കൊല്ലപ്പെടുകയും ചെയ്തു. എന്നു മാത്രമല്ല ചൈനീസ് നഗരങ്ങളിൽ ആന്ത്രാക്സ്, കോളറ തുടങ്ങിയ പകർച്ച വ്യാധികൾ പൊടുന്നനെ വ്യാപിക്കുകയും ഉണ്ടായി.

ഒന്നാം ലോക മഹായുദ്ദ കാലത്ത് കന്നു കാലികൾ, കുതിരകൾ തുടങ്ങിയവയിലൂടെ എതിരാളികൾക്ക് മേൽ പകർച്ച വ്യാധികൾ പരത്താൻ പല രാജ്യങ്ങളും പരസ്പരം ശ്രമിയ്ക്കുകയുണ്ടായി.

1939 - 1945 ലെ രണ്ടാം ലോകമഹായുദ്ധ കാലത്ത് , ബ്രിട്ടീഷ്-അമേരിക്കൻ ശാസ്ത്രജ്ഞർ വസൂരിയെ വീണ്ടും ജൈവ ആയുധമായി ഉപയോഗിക്കുകയുണ്ടായി. എന്നാൽ വസൂരിയ്ക്ക് എതിരേയുള്ള വാക്സിനുകളുടെ ലഭ്യത കാരണം അവർ അതിനെ ഒരു ഫലപ്രദമായ ആയുധം ആയി കണക്കാക്കിയില്ല എന്നു മാത്രം.

ഇത്തരം നിരവധി ജൈവായുധ പ്രയോഗങ്ങളേക്കുറിച്ച് ചരിത്രത്തിലെ ഒട്ടേറെ ഏടുകളിൽ നിന്ന് കാണാൻ സാധിക്കും. മെക്കാനിക്കൽ ആയുധങ്ങൾക്ക് നേടാൻ കഴിയുന്നതിലും അധികമായി ഫലം കൈവരിക്കാൻ ഇത്തരമൊരു അദൃശ്യ യുദ്ധമുറയാൽ സാധിക്കുന്നു.
*************************
(*1) കാഫ്ഫാ / caffa : - now Feodossia, UKRAINE.
(*2) Pontiac's War, Pontiac's Conspiracy, or Pontiac's Rebellion.

ലാബോറട്ടറികളിലെ ഫ്രീസറുകളിൽ സോവിയറ്റ് യൂണിയനും അമേരിക്കയും.
_________________________________________________________

ജൈവായുധങ്ങളുടെ കാര്യത്തിൽ ഇന്ന് ബ്രിട്ടൺ ഒരു പ്രധാന ശക്തിയല്ല. പകരം ആ സ്ഥാനത്തേക്ക് പുതിയ മഹാശക്തികൾ ഉദിച്ചുയർന്നു. അമേരിക്കയും റഷ്യയും ഇന്ന് ഈ നശീകരണായുധത്തിന്റെ കാര്യത്തിൽ മേധാവിത്വം പുലർത്തുന്നു.

അമേരിക്കയ്ക്കൊപ്പമോ, അവരേക്കാൾ ബഹുദൂരമോ മുൻപിലാണ് ഇക്കാര്യത്തിൽ പഴയ സോവിയറ്റ് യൂണിയനും അവരുടെ തിരുശേഷിപ്പായ ഇന്നത്തെ റഷ്യയും എന്ന് എടുത്തു പറയണം. സോവിയറ്റ് യൂണിയന്റെ കാലം മുതൽക്കേ രാസ ജൈവായുധങ്ങളിൽ അവർ നേടിയ പുരോഗതി, വരും കാലത്തെ ആശങ്കാകുലമാക്കുന്നു. കോൾഡ് വാർ കാലത്ത് നേടിയ ഒട്ടേറെ ശാസ്ത്ര സാങ്കേതിക വളർച്ചയ്ക്കൊപ്പം, ഇരു രാജ്യങ്ങളിലേയും ലാബോറട്ടറികളിൽ അതിമാരക വൈറസുകളേയും ബാക്ടീരിയകളേയും ഇരുവരും മത്സരിച്ച് വികസിപ്പിച്ചിരുന്നു എന്നു കൂടി നാം അറിയേണ്ടതാണ്.

1928 മുതൽ 1971 വരെ സോവിയറ്റ് യൂണിയൻ ഒന്നാമത്തെ സൂപ്പർ പവർ ആയിക്കൊണ്ടിരുന്ന അഥവാ ആയിത്തീർന്ന കാലഘട്ടമായിരുന്നു. ശാസ്ത്ര സാങ്കേതിക മേഖലയെ സംബന്ധിച്ചിടത്തോളം 1972 മുതൽ 1993 വരെ, ശരിക്കും പുരോഗമനപരമായ ഒരു കാലമായിരുന്നു. ജനിതക എഞ്ചിനീയറിങ് - പ്രത്യേകിച്ചും പുതിയ തന്മാത്രാ ജനിതക സാങ്കേതിക വിദ്യകൾ (molecular genetics techniques) അവർ വികസിപ്പിച്ചെടുത്തു. ബാക്ടീരിയകൾ വൈറസുകൾ എന്നിവയ്ക്ക് എതിരേ കൂടുതൽ മെച്ചപ്പെട്ട വാക്സിനുകൾ സോവിയറ്റ് റഷ്യ നിർമിച്ചു.

ന്യൂക്ലിയർ ആയുധങ്ങളേക്കുറിച്ച് ഗഹനമായ പഠനങ്ങൾ നടത്തുകയും, യുഎസ് യൂണിവേഴ്സിറ്റികളിൽ നിരവധി സംവാദങ്ങൾ നയിക്കുകയും ചെയ്ത അലക്സ് വെല്ലെർസ്റ്റ്യൺ (Alex Wellerstein) ബയോ വെപ്പണുകളേക്കുറിച്ച് എഴുതിയ ഒരു ലേഖനത്തിൽ ഇങ്ങനെ വിശദീകരിക്കുന്നു. അമേരിക്കക്കാർ ഒരു കാര്യം ചെയ്യാൻ തുടങ്ങുമ്പോൾ സോവിയറ്റ് യൂണിയനും അതേ കാര്യം ആരംഭിക്കും. (ചിലപ്പോൾ നേരേ തിരിച്ചും). എന്നാൽ സോവിയറ്റ് യൂണിയൻ / റഷ്യ, അവരുടെ തനതായ, സ്വന്തമായ ഒരു വഴിയിലൂടെയാവും മുന്നോട്ടു പോകുക. ഇതൊരു സ്ട്രാറ്റജിയുടെ പരാധീനത അല്ല. പകരം സാമ്പത്തിക പ്രശ്നങ്ങൾ അഭിമുഖീകരിക്കുന്ന റഷ്യയെ സംബന്ധിച്ചിടത്തോളം അവരുടെ ശാസ്ത്ര നേട്ടങ്ങൾക്കുള്ള ശ്രമങ്ങളിൽ സാമ്പത്തികം കൂടി നോക്കേണ്ടുന്ന കാര്യം പ്രധാനമായതു കൊണ്ടാണ്. അമേരിക്ക ഒരു പ്രോഗ്രാം അവതരിപ്പിക്കുമ്പോൾ തത്സമയം തന്നെ അതിന്റെ ഡിസൈൻ മനസ്സിലാക്കി തങ്ങളുടെ സ്വന്തമായ മറ്റൊരു സാങ്കേതികത ഉപയോഗിച്ച് അതിനോട് കിടപിടിക്കുന്നതോ അതിനും മേലെ നിൽക്കുന്നതോ ആയ പലതും റഷ്യ നിർമ്മിച്ചു. റഷ്യ കോപ്പി ചെയ്യുന്നു എന്ന് നാം ഇതിനെ വില കുറച്ചു കാണേണ്ടുന്നതില്ല. പകരം, സ്വന്തം കഴിവുപയോഗിച്ച് എത്ര വലിയ ടെക്നോളജിയും സ്വായത്തമാക്കുകയും, കൂടുതൽ വൈവിധ്യങ്ങൾ അതിൽ ഉൾക്കൊള്ളിക്കാൻ ശ്രമിക്കുകയും ചെയ്യുന്ന റഷ്യക്കാർ തികച്ചും പ്രശംസ അർഹിക്കുന്നു. എന്നു മാത്രമല്ല, ബയോളജിക്കൽ വെപ്പണുകളെ സംബന്ധിച്ച് പറഞ്ഞാൽ, ബാക്ടീരിയകൾക്കെതിരേയും, വൈറസുകൾക്കെതിരേയും അമേരിക്ക വാക്സിനുകൾ കണ്ടു പിടിച്ചു കൊണ്ടിരുന്ന കാലത്ത്, റഷ്യ, ബാക്ടീരിയകളേയും - വൈറസുകളേയും സങ്കരിപ്പിച്ച് പുതിയ കണ്ടുപിടുത്തങ്ങൾ തന്നെ നടത്തുകയുണ്ടായി.

വിചിത്രമായ ഒരു സംഗതി, ഏതെങ്കിലും ജൈവായുധം വിക്ഷേപിക്കാവുന്ന ഒരു മെക്കാനിസം കോൾഡ് വാർ കാലത്ത് സോവിയറ്റ് യൂണിയന് ഇല്ല എന്നതായിരുന്നു . അതായത് അവർ U.S. നെ ടാർഗറ്റ് ചെയ്യുന്നില്ലായിരുന്നു എന്നാണതിന്റെ അർഥം . ICBM - ൽ ഇത്തരം ജൈവായുധം കൂട്ടി യോജിപ്പിക്കാൻ അവർ ശ്രമിച്ചില്ല. അഥവാ ഇനി അങ്ങനെ ശ്രമിച്ചിരുന്നെങ്കിൽ തന്നെ അത് എങ്ങുമെങ്ങുമെത്തിയുമില്ല.

മിഖായേൽ ഗോർബച്ചേവിന്റെ കാലഘട്ടത്തിൽ, അദ്ദേഹം ഉൾപ്പെടെ വെറും നാലേ നാലുപേർക്കേ സോവിയറ്റ് ബയോ വെപ്പൺ പ്രോഗ്രാമിനെക്കുറിച്ച് പൂർണ്ണമായ കഥ അറിയാമായിരുന്നുള്ളു. അമേരിക്കൻ പ്രസിഡന്റായിരുന്ന George H.W. Bush, ഇന്റലിജൻസ് റിപ്പോർട്ടുമായി ബന്ധപ്പെട്ട് ഇക്കാര്യത്തേക്കുറിച്ചൊരു വിശദീകരണത്തിന് ഗോർബച്ചേവിനെ നിർബന്ധിച്ചെങ്കിലും ഗോർബച്ചേവ് മുടന്തൻ ന്യായങ്ങൾ പറഞ്ഞ് ഒഴിഞ്ഞുമാറുകയാണുണ്ടായത്. ബയോ വെപ്പണുകൾ കൊണ്ട് ലോകത്തെ അധീശ ശക്തിയാകാം എന്നൊക്കെ ഗോർബച്ചേവ് കരുതിയിരുന്നു. എന്നാൽ സോവിയറ്റ് യൂണിയന്റെ തകർച്ച അത്തരമൊരു നാശത്തിൽ നിന്ന് ലോകത്തെ രക്ഷിച്ചു.

സോവിയറ്റ് യൂണിയൻ തങ്ങളുടെ ബയോളജിക്കൽ വാർഫെയർ പ്രോഗ്രാം ഊർജ്ജിതമാക്കിയതിന്റെ പിന്നാമ്പുറത്തേക്കുറിച്ച് അലക്സ് വെല്ലർസ്റ്റ്യൺ ഒരു സംഭവം പങ്കു വെക്കുന്നുണ്ട്. 1960 ൽ പസഫിക് സമുദ്രത്തിലെ ജോൺസ്ടൺ ഐലന്റിൽ FBI യും US ആർമിയും ചേർന്ന് ഒരു ജൈവായുധ പരീക്ഷണം നടത്തുകയുണ്ടായി. സോവിയറ്റ് KGB ഉധ്യോഗസ്ഥനായ ഒരു ഡബിൾ ഏജന്റ് ഈ കൂട്ടത്തിൽ ഉണ്ടായിരുന്നു. ഈ ഏജന്റിൽ നിന്ന് ഈ വിവരം അറിഞ്ഞ റഷ്യ ഞെട്ടി. അമേരിക്ക ഊർജ്ജിതമായി ജൈവായുധ നിർമാണത്തിലാണ് എന്നത് റഷ്യയെ ഇരുത്തി ചിന്തിപ്പിച്ചു. ഈ സംഭവമായിരുന്നു പിന്നീട് റഷ്യയുടെ ജൈവായുധ ഗവേഷണങ്ങൾക്ക് ആക്കം കൂട്ടിയത്.

ജൈവായുധ വിരുദ്ധ സമ്മേളനം (Biological Weapons Convention)
____________________________________________________

1969 നവംബറിൽ, യു.എസ് പ്രസിഡന്റ് റിച്ചാർഡ് നിക്സൺ ജൈവ ആയുധങ്ങൾ നിർമിക്കുന്നതും പ്രയോഗിക്കുന്നതും കുറ്റകരമാക്കി പ്രഖ്യാപിച്ചു. വിയറ്റ്നാം യുദ്ധസമയത്ത് നടത്തിയ രാസായുധങ്ങളുടെ ഉപയോഗം, അമേരിക്കൻ ജനങ്ങളുടെ വെറുപ്പിനിടയാക്കിയ സമ്മർദ്ദം മൂലമായിരുന്നു ഇത് . നിക്സന്റെ ചരിത്രപരമായ ജൈവ ആയുധ നിരോധനത്തിന്റെ പശ്ചാത്തലത്തിൽ, അവർക്ക് ഭയമുള്ള സോവിയറ്റ് യൂണിയൻ ഉൾപ്പെടെയുള്ളവരെ അത്തരം നിയമത്തിൽ കൊണ്ടുവരാനായി അമേരിക്ക ഒരു അന്താരാഷ്ട്ര കരാറുണ്ടാക്കൻ ശ്രമമാരംഭിച്ചു.

1972 - ഏപ്രിൽ 10 ന് യുണൈറ്റഡ് സ്റ്റേറ്റ്സ്, യു.കെ, സോവിയറ്റ് യൂണിയൻ എന്നിവർ എല്ലാത്തരം ബയോളജിക്കൽ ആയുധങ്ങൾക്കുമെതിരായുള്ള ഒരു കൺവൻഷൻ വിളിച്ചു കൂട്ടി. അതായിരുന്നു Biological Weapons Convention. 1925 ലെ ജനീവ പ്രോട്ടോക്കോളിന്റെ തുടർച്ചയായിരുന്നു ഇത്. സോവിയറ്റ് യൂണിയനും, ബ്രിട്ടനും കരാർ വ്യവസ്ഥകൾ പാലിക്കും എന്ന് വാഗ്ദാനം ചെയ്തു. (ഇതിൽ ഒപ്പു വെച്ചത് യു എസ് 1975 ലാണ്.) അതോടെ U.S.ന് ആശ്വാസമായി. അവരെ പോലെ (?), സോവിയറ്റ് യൂണിയനും അവരുടെ ജൈവായുധങ്ങൾ ഉപേക്ഷിക്കുമെന്ന് യു എസ് വിശ്വസിച്ചു. എന്നാൽ തങ്ങളുടെ ബയോളജിക്കൽ സ്റ്റോറേജുകൾ പരിശോധിക്കാൻ മറ്റാർക്കും അവകാശമില്ല എന്ന് സോവിയറ്റ് യൂണിയൻ പ്രഖ്യാപിക്കുകയുണ്ടായി.

പക്ഷേ, അമേരിക്കയുടെ വിശ്വാസം തെറ്റായിരുന്നു എന്ന് വൈകാതെ തന്നെ അവർക്ക് ബോധ്യമായി. 1989 -ൽ ഒരു മുതിർന്ന സോവിയറ്റ് ബയോളജിക്കൽ വെപ്പൺ സയന്റിസ്റ്റ് യു.കെയിലെ ക്ക് കൂറു മാറി. വ്ലാഡിമർ പാസെഷ്നിക് (Vladimir Pasechnik) ആയിരുന്നു അത്. അമേരിക്കയും സോവിയറ്റ് യൂണിയനുമായുള്ള കരാറിന്റെ ഭാഗമായി ആണവായുധങ്ങൾ ഉൾപ്പെടെയുള്ളവ കുറച്ചു കൊണ്ടിരുന്ന കാലത്ത്, സോവിയറ്റ് യൂണിയൻ തങ്ങളുടെ ജൈവായുധ വികസനം അതീവ രഹസ്യമായി തുടരുകയായിരുന്നു എന്ന് പാസെഷ്നിക് തുറന്നു പറഞ്ഞു. സോവിയറ്റുകൾ 1973 ൽ സ്ഥാപിച്ച BIOPREPARAT (*3) എന്ന സിവിലിയൻ ഫാർമസ്യൂട്ടിക്കൽ കമ്പനി, യഥാർഥത്തിൽ ജൈവ-ആണവായുധങ്ങൾ വിപുലപ്പെടുത്തുന്ന ഒന്നായിരുന്നു എന്ന രഹസ്യം പാസെഷ്നിക് വെളിപ്പെടുത്തി.
*************************
(*3) BIOPREPARAT : - Biopreparat was the Soviet Union's major biological warfare agency from the 1970s on

കെൻ അലിബെക്കോവിന്റെ വെളിപ്പെടുത്തലുകൾ.
______________________________________

എന്നാൽ കൂടുതൽ സ്ഫോടനാത്മകമായ വിവരങ്ങൾ വരാൻ പോകുന്നതേ ഉണ്ടായിരുന്നുള്ളു. 1992 ൽ അമേരിക്കയിലേക്ക് കൂറുമാറിയ, സോവിയറ്റ് യൂണിയനിലെ മൈക്രോ ബയോളജിസ്റ്റും - ബയോളജിക്കൽ വാർഫെയർ എക്സ്പേർട്ടുമായിരുന്ന ഡോ: കെന്നത് അലിബെക്കോവ് (Kanatjan Alibekov) ആയിരുന്നു സോവിയറ്റ് ബയോവാർഫെയർ പദ്ദതികളേക്കുറിച്ച് ഞെട്ടിക്കുന്ന വെളിപ്പെടുത്തലുകൾ നടത്തിയത്. 1987 മുതൽ 1992 വരെ BIOPREPARAT ലാബോറട്ടറിയുടെ ചീഫ് സയിന്റിസ്റ്റ് ആയിരുന്നു ഡോ: കെന്നത് അലിബെക്കോവ് .
കെൻ അലിബെക്ക് പങ്കു വെച്ച വിവരങ്ങൾ കേട്ട് ബ്രിട്ടനും, യുണൈറ്റഡ് സ്റ്റേറ്റ്സും ഞെട്ടി.

വസൂരിയെ സംബന്ധിച്ചായിരുന്നു അലിബെക്കിന്റെ ഏറ്റവും വലിയ വെളിപ്പെടുത്തൽ. വസൂരി (Smallpox) പടർന്നപ്പോൾ അതിനെ പ്രധിരോധിക്കാനുള്ള ഗവേഷണങ്ങളുടെ കാലത്ത്, റഷ്യൻ ഡോക്ടർമാർ എടുത്ത വസൂരി സാമ്പിളുകൾ സോവിയറ്റ് സൈന്യത്താൽ പിന്നീട് മാരക ജൈവായുധങ്ങളായി മാറി വന്നതു എങ്ങനെ എന്ന് കെൻ ബെക്ക് ലോകത്തെ അറിയിച്ചു. വസൂരി (Smallpox) മനുഷ്യ കുലത്തെ ഉന്മൂലനം ചെയ്യുന്നതാണെന്ന് റഷ്യയ്ക്ക് അറിയാം എന്ന് അലിബെക്ക് പറയുന്നു. എന്നാൽ ഇത് സൂക്ഷിക്കേണ്ടിയിരിക്കുന്നു, അതിനു രണ്ടു കാരണങ്ങളുണ്ട്. ഒന്ന്, ഭാവിയിൽ ഉണ്ടാകാൻ ചാൻസുള്ള മറ്റേതെങ്കിലും ഒരു മാരക രോഗത്തിനെതിരേ ചിലപ്പോൾ വസൂരി രോഗാണു പ്രധിരോധത്തിനുപകരിക്കും. രണ്ട്, മനുഷ്യജീവൻ ഉന്മൂലനം ചെയ്യാനായ ഏറ്റവും ശക്തമായ ഒരു ആയുധവും ആയിരിക്കും.

ഇന്ന് റഷ്യ അമേരിക്ക എന്നിവരുടെ പക്കൽ മാത്രമേ വസൂരി വൈറസ് ശേഷിച്ചിട്ടുള്ളു. ലോകത്തിലെ അവശേഷിക്കുന്ന ഈ രണ്ട് വസൂരി സാമ്പിളുകൾ റഷ്യയിലും അമേരിക്കയിലും ഉള്ള രണ്ട് ഉയർന്ന ലാബുകളിൽ അതീവ സൂക്ഷ്മമായി ഇപ്പോഴും പരിചരിക്കപ്പെടുന്നു.

വസൂരി വൈറസ് അനൗദ്യോഗിക ഓഹരികളിലൊന്നായി പല രാജ്യങ്ങളിലും ഇപ്പോഴും ഉണ്ടായിരിക്കാൻ സാധ്യതയുണ്ടെന്നും അലി ബെക്ക് സംശയമുന്നയിക്കുന്നു . അമേരിക്ക, റഷ്യ എന്നിവർക്കൊപ്പം വൈറസ് അശ്രദ്ധമായി മനപ്പൂർവം നിലനിർത്തി എന്ന് കരുതപ്പെടുന്ന മറ്റു രാജ്യങ്ങളിൽ ചൈന, ക്യൂബ, ഇന്ത്യ , ഇറാൻ , ഇസ്രായേൽ , പാകിസ്താൻ, യൂഗോസ്ലാവിയ, ഉത്തര കൊറിയ , ഇറാഖ് എന്നീ രാജ്യങ്ങളേയും അലി ബെക്ക് അന്ന് സംശയിച്ചിരുന്നു.

സംഭ്രമജനകമായ പത്ത് ജൈവായുധങ്ങൾ.
_________________________________

1. SMALLPOX (വസൂരി).
2. ANTHRAX (ആടുമാടുകളെ ബാധിക്കുന്ന ഒരു രോഗം).
3. EBOLA (വൈറസ്‌ കാരണം ഉണ്ടാകുന്ന മാരകമായ ഒരു പകർച്ചവ്യാധി ).
4. PLAGUE (എലിപ്പനി).
5. TULAREMIA.
6. BOTULINUM TOXIN.
7. RICE BLAST.
8. RINDERPEST.
9. NIPAH VIRUS.
10. CHIMERA VIRUSES.

തണുത്തുറഞ്ഞു കിടക്കുന്ന പകർച്ച വ്യാധികൾ.
___________________________________

ചരിത്രം നിരത്തുന്ന ജൈവ യുദ്ധ തെളിവുകൾ മാനവ രാശിയുടെ ഭാവിയേയും ആശങ്കയിലാഴ്ത്തുന്നു. അറ്റോമിക്ക് വാർഫെയർ പ്രോഗ്രാമുകളേക്കുറിച്ച് മാത്രമേ നാം എല്ലായ്പോഴും ആശങ്കപ്പെടുന്നുള്ളു. എന്നാൽ അവയോടൊപ്പം നിൽക്കുന്ന വിനാശകരവും ബീഭത്സവുമായ ഒരു നശീകരണ പ്രകൃയ തന്നെയാണ് ബയോളജിക്കൽ വാർഫെയർ പ്രോഗ്രാംസ്. റഷ്യ, അമേരിക്ക എന്നീ രാജ്യങ്ങളുടെ ആഴമുള്ള ലാബോറട്ടറി ഫ്രീസറുകളിൽ എന്തു നടക്കുന്നു എന്ന് തിരിച്ചറിയാൻ നമുക്കാർക്കും കഴിയില്ല. നിലവിലുള്ളതിനേക്കാൾ കടുത്ത മാരക രോഗങ്ങളെ കെട്ടഴിച്ച് വിടാനുള്ള ഹൈബ്രീഡ് ശ്രമങ്ങളിലാണ് സൂപ്പർ പവറുകൾ.

ലോകം, 2001 സെപ്റ്റംബർ 18-ന് ഒരു ആന്ത്രാക്സ് ആക്രമണത്തിന്റെ ആക്രമണത്തിന്റെ മൈനൂട്ടായ ഒരു സൂചനയെ കണ്ടെത്തി എന്നത്, അത്തരം ഒരു സാധ്യത ഏതു രാജ്യത്തും, ഏതു സമയത്തും എപ്പോൾ വേണമെങ്കിലും പൊട്ടിപ്പുറപ്പെടാം എന്ന അടയാളമാണ് നൽകുന്നത്. മാനവരാശിയെ ഇഞ്ചിഞ്ചായി കൊല്ലാനുതകുന്ന പകർച്ച വ്യാധികൾ ലാബോറട്ടറികളിൽ നിന്ന് ഒരിക്കലും പുറത്തേക്ക് പ്രവഹിക്കാതിരിക്കട്ടെ എന്ന് നമുക്ക് പ്രത്യാശിക്കാം.

********************************************
റഫറൻസ് : - ബയോളജിക്കൽ വാർഫെയർ സംബന്ധിച്ച് Stefan Riedel, Colette Flight, Alex Wellerstein എന്നിവരുടെ ലേഖനങ്ങൾ, ഒപ്പം വിക്കി പീഡിയ മറ്റ് ഗൂഗിൾ ഇൻഫർമേഷനുകൾ എന്നിവ.

വസ്തുതകൾക്കനുബന്ധമായ ചിത്രങ്ങൾ ആദ്യ കമന്റുകളിൽ കാണാവുന്നതാണ്.

നാഥു ലാ ആക്രമിക്കപ്പെട്ട രാത്രി.

 1948, 1965, 1971, 1999 വർഷങ്ങളിലായി നാലു തവണ ഇൻഡ്യയും പാക്കിസ്ഥാനും തമ്മിൽ യുദ്ധങ്ങളുണ്ടായി. 1962 ൽ ചൈനയുമായും. ഇങ്ങനെ ഭൂമുഖത്തെ ഏറ്റവും അശാന്തമായ പ്രദേശങ്ങളിലൊന്നായിത്തീർന്നു ഇൻഡ്യൻ ഉപഭൂഖണ്ഡം. ഇപ്പോഴും അതിർത്തി തർക്കങ്ങളും, സംഘർഷ സാദ്ധ്യതകളും തുടരുകയും ചെയ്യുന്നു. പാകിസ്താനുമായുള്ള നാല് യുദ്ധങ്ങളും വിജയിച്ച ഇൻഡ്യ പക്ഷേ, 62 ൽ ചൈനയോട് പരാജയപ്പെടുകയുണ്ടായി.

1962 ലെ ഇൻഡോ ചൈനാ യുദ്ധം ഇൻഡ്യൻ ചരിത്രത്തിലെ കറുത്ത അടയാളമാണ്. ഇൻഡോ ചീനി ഭായി ഭായി എന്ന് വിശ്വസിച്ച് നടന്നിരുന്ന നമ്മെ അവർ പിന്നിൽ നിന്നു കുത്തുകയായിരുന്നു.
62 നു ശേഷം 2017 വരെയുള്ള കാലം വരെ ചൈനയുമായുള്ള അതിരുകളിൽ സംഘർഷങ്ങൾ പലത് നടക്കുകയുണ്ടായി. എന്നാൽ അതൊന്നും മൂർശ്ചിക്കുകയുണ്ടായില്ല. ഇൻഡ്യയും പാക്കിസ്ഥാനും തമ്മിൽ പലപ്പോഴും ഉണ്ടാകാറുള്ളതു പോലെ, ഇന്ത്യയും ചൈനയും തമ്മിലുള്ള അതിർത്തി പ്രശ്നങ്ങൾ വലിയ രീതിയിലുള്ള ചൂടുപിടിച്ച ചർച്ചകൾക്കോ, ലോക ശ്രദ്ധ തിരിയുന്നതിലേക്കോ, സമാധാന ചർച്ചകൾക്കോ വിഷയമായിട്ടില്ല.

ലോകത്തെ വൻ ശക്തിയായ ചൈന പിന്നീടെന്തുകൊണ്ട് അതിർത്തി തർക്കത്തിന്റെ ഭാഗമായി ഇൻഡ്യയെ ആക്രമിച്ചില്ല? ഈ ചോദ്യത്തിനുള്ള വലിയ ഉത്തരമാണ് 67 ൽ നടന്ന നാഥു ലാ - ചോ ലാ ഏറ്റുമുട്ടൽ (Nathu La and Cho La Clashes).!

.

പരാജയത്തിൽ നിന്ന് പഠിച്ച പുതിയ തിരിച്ചറിവുകൾ
*******************************************************************************
62 യുദ്ധത്തിനു ശേഷം ഇൻഡ്യ രാജ്യാന്തര / പ്രതിരോധ നിലപാടുകൾ പൊളിച്ചെഴുതുകയുണ്ടായി. നെഹ്രു ആവിഷ്കരിച്ച ചേരി ചേരാ പ്രസ്ഥാനത്തിൽ നിന്ന് നമുക്ക് പ്രത്യേകിച്ച് ഗുണങ്ങളൊന്നുമില്ലെന്ന് ഇൻഡ്യ അന്ന് മനസ്സിലാക്കി. അന്ന് പാക് പക്ഷത്താണ് അമേരിക്ക. തങ്ങളുടെ അതിരുകളിൽ പാക്കിസ്ഥാൻ ചൈന എന്നിങ്ങനെ രണ്ടു ശത്രുക്കൾ ഉടലെടുത്തതോടെ സ്വഭാവികമായും ഇൻഡ്യ സോവിയറ്റ് യൂണിയനോട് കൂടുതൽ ചായ്വ് കാട്ടിത്തുടങ്ങി. മൂന്നു വർഷങ്ങൾക്കപ്പുറം 65 ൽ, പാക്കിസ്ഥാനുമായി വീണ്ടുമൊരു യുദ്ധം വന്നു. അത് കഴിഞ്ഞ് രണ്ടു വർഷങ്ങൾ തികയുമ്പോഴേക്കും ഇൻഡ്യയും ചൈനയും തമ്മിൽ 67 ൽ വീണ്ടും ഉരസലുണ്ടായി. ഇതാണ് നാഥു ലാ - ചോ ലാ ഏറ്റുമുട്ടൽ.

ഇൻഡ്യയ്ക്കും ടിബറ്റിനുമിടയിലെ പഴയ സിൽക്ക് റൂട്ടിന്റെ ഭാഗമായിരുന്നു നാഥുലാ പാസ്. 1947 ൽ ഇൻഡ്യയ്ക്ക് സ്വാതന്ത്ര്യം ലഭിച്ചപ്പോൾ സിക്കിം ഒരു സ്വതന്ത്ര നാട്ടുരാജ്യമായിത്തന്നെ നിന്നു. അങ്ങനെയിരിക്കെ 1950 ൽ ചൈന ടിബറ്റിനെ തങ്ങളുടെ അധീനതയിലാക്കി. പ്രക്ഷോഭങ്ങളും എതിർ ശബ്ദങ്ങളും അടിച്ചൊതുക്കപ്പെട്ടതോടെ ടിബറ്റൻ ജനത സിക്കിമിലേക്ക് പലായനം ചെയ്യാനാരംഭിച്ചു. ഇത് സിക്കിമിനെ ആശങ്കപ്പെടുത്തി. ടിബറ്റ് പിടിച്ചടക്കിയതു പോലെ ചൈന തങ്ങളേയും പിടിച്ചടക്കിയേക്കാം എന്നതായിരുന്നു അത്. ഇക്കാലത്ത് ടിബറ്റിനൊപ്പമായിരുന്നു ഇൻഡ്യ. ദലൈ ലാമയ്ക്ക് ഇൻഡ്യ അഭയം നൽകുകയും ചെയ്തു. ഇത് ചൈനയെ അലോസരപ്പെടുത്തി. ടിബറ്റിലെ വിപ്ലവത്തിന് ഇൻഡ്യ പിന്തുണ പകരുന്നു എന്ന് അവർ ആരോപിച്ചു.

അക്കാരണത്താലാണ് 1962 ലെ ഇൻഡോ ചൈന യുദ്ധം പൊട്ടിപ്പുറപ്പെടുന്നത്. അധികം താമസിയാതെ സിൽക്ക് റൂട്ടെന്നറിയപ്പെട്ട നാഥുലാ പാസ് അടച്ചു പൂട്ടി. അതുവഴിയുള്ള ഇൻഡ്യയുടേയും സിക്കിമിന്റേയും വ്യാപാരം നിന്നു. ഇൻഡ്യയ്ക്ക് മേൽ ചൈന കൈ വെച്ചതോടെ സിക്കിമും അശാന്തിയിലായി. ഏത് സമയവും ചൈനീസ് വ്യാളി തങ്ങളെ വിഴുങ്ങാനെത്തും എന്നവർ ഉറപ്പിച്ചു.

അങ്ങനെയിരിക്കെ 1965 ൽ ഇൻഡ്യ പാക്കിസ്ഥാൻ യുദ്ധം ആരംഭിച്ചു. അന്ന് പാക്കിസ്ഥാനെ സഹായിക്കാനായി നാഥു ലാ, ജെലെപ് ലാ (Nathu La and Jelep La,) എന്നിവിടങ്ങളിൽ നിന്ന് പിൻവാങ്ങാൻ ചൈന ഇന്ത്യയോട് ഭീക്ഷണി മുഴക്കിയിരുന്നു. കാര്യങ്ങൾ ഇങ്ങനെ പോകവേ, 1967 ൽ ഇൻഡോ-സിനോ അതിരുകൾ വീണ്ടും പ്രകമ്പനം കൊണ്ടു. നാഥു ലായിലായിലും ച്ചോ ലായിലുമായിരുന്നു ഇത്തവണ ചൈനീസ് അതിക്രമം. 1967 സെപ്ടംബർ 11 മുതൽ 14 വരെ നാഥുലയിലും, ഒക്ടോബർ 1 ന് ചോ ലാ യിലും നടന്ന ഏറ്റുമുട്ടലായിരുന്നു Nathu La and Cho La Clashes.

.

നാഥു ലാ, ചോ ലാ ഏറ്റുമുട്ടൽ
*********************************************
ഇൻഡ്യയും ചൈനയും തമ്മിൽ പങ്കിടുന്നത് 4000 കിലോമീറ്റർ അതിർത്തിയാണ്. കൃത്യമായി അടയാളപ്പെടുത്തപ്പെട്ടിട്ടില്ലാത്ത അതിർത്തിയാണിത്.

സിക്കിം ടിബറ്റ് ബോർഡറിലെ താഴ്വരയോട് ചേർന്നുള്ള നാഥുലാ പാസിൽ, 20 - 30 മീറ്റർ അപ്പുറവും ഇപ്പുറവുമായി ഇൻഡോ ചീനി പട്ടാളക്കാർ തമ്പടിച്ചിരുന്നു. 62 യുദ്ധത്തിനു ശേഷം ഇന്ത്യൻ സേന വൻ തോതിൽ ചൈനീസ് അതിർത്തിയിൽ വിന്യസിക്കപ്പെട്ട കാലമായിരുന്നു അത്. ഇതോടെ, പീപ്പിൾസ് ലിബറേഷൻ ആർമി, ലൗഡ് സ്പീക്കറുകളുപയോഗിച്ച് ഇൻഡ്യയോട് അവിടം വിട്ട് പിൻവാങ്ങാൻ ഭീക്ഷണികൾ മുഴക്കുക പതിവായി.

അങ്ങനെ പോകവേയാണ് ഇവിടം വീണ്ടും അശാന്തിയുടെ മുൾ മുനയിലായത്. 1967 ഓഗസ്റ്റ് 13 ന് ഇൻഡ്യൻ ട്രഞ്ചുകളിലേക്ക് പീപ്പിൾസ് ലിബറേഷൻ ആർമിയുടെ ഗ്രൗണ്ട് ഫോഴ്സ് പ്രകോപനപരമായി അതിക്രമിച്ചു കയറി. അവർ കരസേനയുടെ ബങ്കറുകൾ നശിപ്പിച്ചു. എന്നാൽ ഇൻഡ്യ ഇത് സിക്കിം അതിർത്തിയിൽ പെട്ടതാണെന്ന് ചൈനയെ അറിയിച്ചു .അവിടെ നിന്ന് പിൻവാങ്ങാൻ അവരോട് ആവശ്യപ്പെടുകയും ചെയ്തു.

ബങ്കറുകൾ നശിപ്പിക്കപ്പെട്ടതിനേത്തുടർന്ന്, തൊട്ടടുത്ത ദിവസം നാഥു ലായിൽ ഇൻഡ്യൻ സൈന്യം അതിർത്തി വേലി കെട്ടാൻ ആരംഭിച്ചു. ഓഗസ്റ്റ് 18 മുതൽ ചൈനീസ് അതിർത്തിയിൽ നെടു നീളത്തിൽ വേലി ഉയർന്നു തുടങ്ങി. ഇതോടെ, വീണ്ടും ചൈനീസ് സൈന്യം വൻ ആയുധ സന്നാഹങ്ങളോടെയെത്തുകയും, ഇൻഡ്യ നിർമ്മിച്ച വേലികൾ പൊളിച്ചു കളയാൻ ആരംഭിക്കുകയും ചെയ്തു. അന്ന് പരസ്പരം സംഘർഷം നടന്നെങ്കിലും വെടിവെയ്പ്പുണ്ടായില്ല.

സെപ്ടംബർ. 7 ന് ഇൻഡ്യ വീണ്ടും നാഥുലയുടെ തെക്ക് ഭാഗത്ത് വേലി നിർമ്മാണം പുനരാരംഭിച്ചു. അപ്പോൾ ചൈനീസ് സൈനികർ അവിടേക്കുമെത്തി. അവരുടെ കമാൻഡർ, ഇൻഡ്യൻ കമാൻഡർക്ക് വീണ്ടും മുന്നറിയിപ്പ് നൽകി. ഇതിനെ തുടർന്നുണ്ടായ സംഘട്ടനത്തിൽ ഇരു ഭാഗത്തും ചില സൈനികർക്ക് പരുക്കേറ്റു.

സെപ്തംബർ 11 ന്, ഇൻഡ്യ തങ്ങളുടെ അതിർത്തി സൂചിപ്പിക്കാൻ, നാഥു ലായിൽ നിന്ന് സെബു ലാ വരെ, മറ്റൊരു വേലി കെട്ടാൻ തീരുമാനിച്ചു. ഇന്ത്യൻ കരസേനയിലെ എൻജിനീയർമാരും ജവാന്മാരും ഇത് തുടരുമ്പോൾ, പെട്ടന്ന് ചൈനീസ് സൈനികരും, അവരുടെ രാഷ്ട്രീയ കമ്മിസാറും അവിടേക്കെത്തി. വേലി കെട്ടൽ തടസ്സപ്പെടുത്താനുള്ള അവരുടെ ഉദ്യമത്തെ, ഇൻഡ്യൻ ലെഫ്റ്റനന്റ് കേണൽ തന്റെ പ്ലാറ്റൂണുമായി തടഞ്ഞു. ഇരു കൂട്ടരും തമ്മിലുള്ള തർക്കം വലിയ വെല്ലുവിളികളായി മാറി...

അൽപ്പം കഴിഞ്ഞ്, ചൈനീസ് സൈന്യം അവരുടെ ബങ്കറുകളിലേക്കു മടങ്ങി പോയി.
ഇൻഡ്യ വേലി കെട്ടൽ തുടർന്നു.

ഒരു പതിനഞ്ച് മിനിട്ട് കഴിഞ്ഞപ്പോൾ, പൊടുന്നനെ ചൈനീസ് ഭാഗത്ത് നിന്നും ഒരു വിസിൽ ഉച്ചത്തിൽ മുഴങ്ങി. തൊട്ടു പിന്നാലെ മീഡിയം മെഷീൻ ഗണ്ണുകളിൽ നിന്ന് ഇൻഡ്യൻ സൈനികർക്ക് നേരേ തീയുണ്ടകൾ വർഷിക്കാനാരംഭിച്ചു. അപ്രതീക്ഷിതമായ ഈ ആക്രമണത്തിൽ ഇൻഡ്യൻ ഭാഗത്ത് ഗുരുതര പരിക്കുകളും, മരണണങ്ങളുമുണ്ടായി. തൊട്ടു പിന്നാലെ ഇന്ത്യക്കെതിരേ അവരുടെ പീരങ്കിയാക്രമണവും ആരംഭിച്ചു.

ഇതോടെ യാഥാർത്ഥ്യത്തിന്റെ സങ്കീർണത മനസ്സിലാക്കിയ ഇൻഡ്യൻ സൈനികർ, തങ്ങളുടെ പക്കലുള്ള ആർട്ടിലറികൾ തുറന്ന് ശക്തമായി തിരിച്ചടിയ്ക്കാൻ തുടങ്ങി. ഇൻഡ്യൻ കരസേനയുടെ തോക്കുകളും പീരങ്കികളും തീ തുപ്പിക്കൊണ്ടിരുന്നു. അടുത്ത മൂന്നു ദിവസങ്ങൾ - രാത്രിയും പകലും കനത്ത ഏറ്റുമുട്ടൽ തുടർന്നു.

പീരങ്കികൾ, മോർട്ടറുകൾ, മെഷീൻ ഗൺ എന്നിവ ഉപയോഗിച്ചായിരുന്നു ഇരുകൂട്ടരുടേയും ഏറ്റുമുട്ടൽ.
നിരവധി ചൈനീസ് ബങ്കറുകൾ കരസേന നശിപ്പിച്ചു. ഇൻഡ്യയുടെ വീറുറ്റ തിരിച്ചടി ചൈനയ്ക്ക് അപ്രതീക്ഷിതമായിരുന്നു. അതിൽ അവരുടെ പതർച്ച പ്രകടമായിരുന്നു. ഇതോടെ ചൈനീസ് നേതൃത്വം അപകടം മണത്തു.

സെപ്റ്റംബർ 14 ന് വെടിനിർത്തൽ പ്രഖ്യാപിക്കപ്പെട്ടു. വെടി നിർത്തലിനു ശേഷം, സെപ്ടംബർ 15/16 ദിവസങ്ങളിലായി
ഇരു കൂട്ടരും തങ്ങളുടെ പ്രദേശത്തുള്ള ശവശരീരങ്ങൾ കൈമാറി.

എന്നാൽ ഇവിടം കൊണ്ട് എല്ലാം ശാന്തമായില്ല.
ഒക്ടോബർ 1 ന് ഇൻഡ്യൻ കരസേനയും, പീപ്പിൾസ് ലിബറേഷൻ ആർമിയും തമ്മിൽ ചോ ലാ അതിർത്തിയിൽ ഏറ്റുമുട്ടി. നാഥു ലായിൽ ന്നിന്നൽപ്പം അകലെ, സിക്കിം-ടിബറ്റ് അതിർത്തിയിലായിരുന്നു ചോ ലാ .

ഈ ഏറ്റുമുട്ടൽ ഒരു ദിവസം നീണ്ടുനിന്നു. ഇവിടേയും ഇൻഡ്യൻ ജവാൻമ്മാർ അതിശക്തമായി തിരിച്ചടിച്ചു. ഇൻഡ്യയുടെ തീവ്രമായ ആക്രമണങ്ങളേത്തുടർന്ന്, ചോ ലായിൽ നിന്ന് മൂന്ന് കിലോമീറ്റർ പിൻവലിയാൻ ചൈന നിർബന്ധിതരായി.

നാഥുല ഇൻസിഡന്റിൽ 32 ചൈനക്കാരും, 65 ഇൻഡ്യൻ ജവാൻമ്മാരും കൊല്ലപ്പെട്ടതായും, എന്നാൽ ചോ ലായിൽ 36 ഇൻഡ്യൻ സൈനികരും അസംഖ്യം ചൈനാ ഭടൻമ്മാരും കൊല്ലപ്പെട്ടതായും ചില നിരീക്ഷണങ്ങൾ പറയുന്നു. എന്നാൽ ഇന്ത്യൻ പ്രതിരോധ മന്ത്രാലയം റിപ്പോർട്ടുചെയ്തത് അനുസരിച്ച്, ഈ രണ്ട് ഏറ്റുമുട്ടലിലും കൂടി ഇൻഡ്യൻ നിരയിൽ 88 പേർ കൊല്ലപ്പെടുകയും 163 പേർക്ക് പരിക്കേൽക്കുകയും ചെയ്തു എന്നാണ്. ഒപ്പം, ചൈനീസ് നിരയിൽ 340 പേർ കൊല്ലപ്പെടുകയും 450 പേർക്ക് പരിക്കേൽക്കുകയും ചെയ്തു എന്നും. അതെന്തു തന്നെയായാലും വൻ ആൾ നാശവും, ബങ്കറുകളുടെ നഷ്ടവും ചൈനയ്ക്കുണ്ടായി.

ഇൻഡ്യയിൽ നിന്ന് ചൈനയ്ക്ക് നേരിട്ട വലിയ തോതിലുള്ള 'രക്തച്ചൊരിച്ചിലുണ്ടായ ആദ്യ സംഭവം ആയിരുന്നു ഇത്. ഈ യുദ്ധത്തിലാണ് ആദ്യമായി, ഇൻഡ്യൻ പോരാട്ട വീര്യം ചൈന മനസ്സിലാക്കിയതും, ശക്തമായ ആയുധങ്ങൾ ഉപയോഗപ്പെടുത്തുന്നതിനുള്ള ചൈനയുടെ അജ്ഞത ലോകത്തിനു വെളിവായതും.

62 ലെ അപ്രതീക്ഷിത പരാജയത്തിന്, നാം നൽകിയ തിരിച്ചടിയായി ചരിത്രകാരൻമ്മാർ ഇതിനെ വ്യാഖ്യാനിക്കുന്നു. ഇൻഡ്യൻ സൈന്യത്തിന്റെ ശക്തമായ പുരോഗതിയുടെ സൂചനയും ഇതിലൂടെ ചൈനയ്ക്ക് മനസ്സിലായി. അന്നാദ്യമായി ഈ സംഭവത്തോടെ അതിർത്തി പിടിച്ചെടുക്കാനുള്ള ചൈനയുടെ നിരന്തരമായ മത്സരത്തിന്, ആദ്യമായി ഇൻഡ്യയിൽ നിന്ന് വിഘ്നം നേരിട്ടു. അന്നത്തെ ആ തിരിച്ചടിയുടെ ഓർമകൾ ഇന്നും അവരെ അലട്ടുന്നുണ്ട്. കാരണം, ആക്രമണഭീതിയോടെ ജീവിക്കാൻ വിധിക്കപ്പെട്ടവൻ എപ്പോഴും കരുതലോടെയിരിക്കും. അങ്ങനെയുള്ളവനെ ഏതു വമ്പനും ഭയപ്പെട്ടേ തീരൂ.

.

67 നു ശേഷം
*********************
ഇൻഡ്യയുടെ ഈ തിരിച്ചടിയ്ക്ക് ശേഷം, ഇന്ത്യ-ചൈന അതിർത്തി പൊതുവിൽ സമാധാനപരമായിത്തീർന്നു. ഇൻഡ്യൻ സൈന്യം ചൈനീസ് അതിരുകളിൽ വിപുലമായ സാന്നിദ്ധ്യം ഏർപ്പെടുത്തുകയും, അതിർത്തിയോട് ചേർന്ന് അവകാശവാദമുന്നയിക്കുന്നതിൽ കൂടുതൽ മിടുക്കു കാട്ടിത്തുടങ്ങുകയും ചെയ്തു.

ഇക്കാലത്ത് സിക്കിമിൽ രാജവാഴ്ച ഇല്ലാതായി. അതുവരെ ഇന്ത്യൻ ഉപഭൂഖണ്ഡത്തെ അംഗീകരിക്കാതിരുന്ന സിക്കിം, 1975 ൽ ഇൻഡ്യൻ യൂണിയനിൽ ലയിച്ചു. സിക്കിം ഒരു ഇന്ത്യൻ സംസ്ഥാനമായി മാറി. 2003 ൽ സിക്കിമിനെ ഇൻഡ്യയുടെ ഭാഗമെന്ന നിലയിൽ ചൈന പരോക്ഷമായി അംഗീകരിച്ചു. ചൈനയ്ക്ക് സിക്കിം ഇപ്പോൾ ഒരു തർക്ക വിഷയമല്ലെന്ന് ചൈനീസ് പ്രധാനമന്ത്രി ഹു ജിന്റാവോ 2005 ൽ പ്രഖ്യാപിച്ചു.

67 ശേഷം, ഇന്ത്യയും ചൈനയും പിന്നീട് ഒരിക്കലും അതിർത്തിയിൽ വെടിവയ്പിൽ ഏർപ്പെടുകയുണ്ടായില്ല. ചൂടുപിടിച്ച വാഗ്വാദങ്ങളും, സൈനികരെ അണിനിരത്തിയിയുള്ള ശാക്തിക പ്രകടനവും ഉണ്ടായിട്ടുണ്ടെങ്കിലും അവയൊന്നും
സായുധ ഏറ്റുമുട്ടലിലേക്ക് വഴി വെച്ചില്ല. അതിന്റെ പ്രധാന കാരണമായി യുദ്ധ സൈദ്ധാന്തികർ പറയുന്നത്, നാഥു ലാ & ചോ ലാ സംഘർഷത്തിലെ ഇൻഡ്യയുടെ അന്നത്തെ പോരാട്ടവീര്യമായിരുന്നു.

1987-ൽ ഇന്ത്യ അരുണാചൽ പ്രദേശ് സംസ്ഥാനം രൂപവത്കരിച്ചു, ചൈന അവകാശപ്പെട്ട പ്രദേശമായിരുന്നെങ്കിലും, ഇന്ത്യ സധൈര്യം അത്തരം ഒരു തീരുമാനത്തിലൂടെ കടന്നു പോയി. ചൈനീസ് ഗവൺമെന്റ് ഇതിൽ പ്രതിഷേധിച്ചെങ്കിലും, ഈ വിഷയവും പരിഹരിക്കപ്പെട്ടു.

1993 ൽ ഇരു രാജ്യങ്ങളും LAC (ലൈൻ ഓഫ് ആക്ച്വൽ കണ്ട്രോൾ) അംഗീകരിച്ചു കൊണ്ടുള്ള ഒരു സമാധാന കരാർ ഒപ്പുവെച്ചു. ഇന്ന് ചൈന ലോകത്തിലെ ഏറ്റവും വലിയ മൂന്നാമത്തെ സൈനീക ശക്തിയും, ഇന്ത്യ ലോകത്തിലെ ഏറ്റവും വലിയ നാലാമത്തെ സൈനീക ശക്തിയുമാണ്. ഒരു യുദ്ധത്തിനായി ഇരുകൂട്ടരും
ഇനി ഇറങ്ങിത്തിരിക്കുകയാണെങ്കിൽ അതിൻറെ ആഘാതം സങ്കൽപ്പങ്ങൾക്കതീതമായിരിക്കും.

ഇൻഡ്യ Vs ചൈന : ശത്രു പടിവാതിൽക്കൽ നിൽപ്പുണ്ട്...

 2013 ഏപ്രിൽ 15.

റാഖി നള.
ദൗലത്ബാഗ് ഓൾഡി.

ലൈൻ ഓഫ് ആക്ച്വൽ കണ്ട്രോളിനു സമീപമുള്ള - അക്സായിചിൻ-ലഡാക്ക് മേഖലയിൽ പെടുന്ന - തന്ത്രപ്രധാന ഇടമായ ദൗലത്ബാഗ് ഓൾഡിയിലെ (Daulat Beg Oldi) റാഖിനളയിൽ ഒരു ചൈനീസ് പ്ലാറ്റൂൺ വന്ന് ക്യാമ്പ് ചെയ്തു. ഇൻഡ്യയുടേയും ചൈനയുടേയും സംയുക്ത പട്രോളിങ്ങ് നടത്തപ്പെടുന്ന ഇവിടം, ഇരു സൈന്യങ്ങളും ഒരു പെർമനന്റ് ബേസ് ആയി കണക്കു കൂട്ടിയിരുന്നില്ല. ചൈനീസ് പട്ടാളം നിലയുറപ്പിച്ചത് കണ്ടതോടെ ഇൻഡ്യ വളരെ പെട്ടന്ന് തന്നെ ചൈനീസ് ക്യാമ്പിന് ഏകദേശം 300 മീറ്റർ എതിരേ ട്രൂപ്പുകളെ വിന്യസിച്ചു. സൈനീക മന്ത്രാലയവും, രാജ്യരക്ഷാ വിഭാഗവും, ന്യൂഡൽഹിയും അലർട്ടായി. രാജ്യത്തിനു മേൽ ഒരു അപ്രതീക്ഷിത യുദ്ദഭീതി നിഴലിട്ടു. ഒട്ടും താമസം കൂടാതെ ഇൻഡോ ചൈനാ ഒഫീഷ്യൽ കോൺഫറൻസുകൾ തീരുമാനിക്കപ്പെട്ടു. ചർച്ചകൾ നടക്കുമ്പോൾ, ഹെലികോപ്ടറുകൾ, ടാങ്കുകൾ, പാരാട്രൂപ്പുകൾ തുടങ്ങിയവ അതിർത്തിയിലെ ക്യാമ്പിനെ സപ്പോർട്ട് ചെയ്യാനായി അയച്ചു കൊണ്ട് പീപ്പിൾസ് ലിബറേഷൻ ആർമി അവരുടെ നയം വ്യക്തമാക്കി. മൂന്നാഴ്ച്ചകളോളം അണിയറയിൽ ഇരു രാജ്യങ്ങളുടേയും ഉന്നത നേതാക്കൾ തമ്മിൽ ചർച്ചകൾ നടന്നു. തർക്കം മേയ് 5-ന് പരിസമാപിച്ചു. തുടർന്ന് രണ്ടു സൈന്യവും ദൗലത്ബാഗ് ഓൾഡിയിൽ നിന്ന് പിന്മാറി. അന്ന് ഒപ്പുവച്ച കറാറിന്റെ ഭാഗമായി ഇൻഡ്യൻ അതിർത്തിയിലെ ചുമാർ മേഖലയുടെ 250 കിലോമീറ്റർ ഭാഗത്തെ മിലിട്ടറി സ്ട്രക്ചറുകൾ പൊളിച്ചു കളയാൻ ഇൻഡ്യ നിർബന്ധിതരായി.

ഇടയ്ക്ക് തർക്കത്തിലുള്ള നമ്മുടെ പ്രദേശങ്ങളിലേക്ക് ചൈനീസ് പട്ടാളം കടന്നു കയറുകയും ചൈനീസ് മെയ്ഡ് സിഗരറ്റ് പാക്കറ്റുകൾ, ബിയർ ബോട്ടിലുകൾ എന്നിവ അവിടവിടെയായി ഉപേക്ഷിക്കുകയും, അതിർത്തിയിലെ പാറകളിൽ ചൈനീസ് അക്ഷരങ്ങൾ കോറിയിടുകയും ചെയ്യാറുണ്ട്. ഇൻഡ്യൻ അതിർത്തിയിൽ ഇൻഡ്യൻ സേനയും ഇത് ചെയ്യുന്നതും പതിവാണ്. ഇതൊരു നിഗൂഡ മുന്നറിയിപ്പാണ്. പ്രദേശത്തിന് തങ്ങളാണ് അവകാശികൾ എന്ന് സ്ഥാപിക്കാനുള്ള മനശാസ്ത്രപരമായ ഒരു നീക്കം. എന്നാൽ ദൗലത്ബാഗ് ഓൾഡിയിലെ ഇൻസിഡന്റ് അതെല്ലാം മറികടന്നു കൊണ്ടുള്ളതായിരുന്നു.

അക്സായ് ചിന്നിലെ ശാക്തിക കിട മത്സരങ്ങൾ.
___________________________________

അരുണാചൽ ഉൾപ്പെടെയുള്ള അതിർത്തി പ്രദേശങ്ങളിൽ ചൈന കൈ കടത്തലിനു മുതിർന്നേക്കാം എന്ന ഭീതി തലയ്ക്ക് മുകളിൽ തന്നെയുണ്ട്. 1962 ലെ ഇൻഡോ ചൈനാ യുദ്ദത്തേ തുടർന്ന് തർക്ക പ്രദേശങ്ങളിൽ ആർക്കും പ്രത്യേക അവകാശം ഇല്ലാതെ രൂപീകരിച്ച Line of Actual Control (LAC) ൽ ചൈനയ്ക്ക് സംതൃപ്തി പോരാ എന്നതാണ് അവരുടെ പുതിയ പല നീക്കങ്ങൾക്കും കാരണം. 62 ലെ യുദ്ദത്തിൽ ഇൻഡ്യയെ ഭയപ്പെടുത്തിയിട്ട് സ്വയം പിൻമാറിയത് തെറ്റായിരുന്നു എന്ന് ഇന്ന് അവർ വിലയിരുത്തുന്നു.

നിരന്തരമുള്ള ചൈനീസ് പ്രകോപനങ്ങൾ നമ്മുടെ ഡിഫൻസീവ് സ്ട്രെങ്തിന്റെ കാര്യത്തിൽ പല വീണ്ടു വിചാരങ്ങൾക്കും ഇട നൽകുന്നുണ്ട്. അതുകൊണ്ടു തന്നെ മുൻപെന്നത്തേക്കാളും വിപുലീകരിച്ച തോതിൽ ന്യൂ ഡൽഹി അതിന്റെ സായുധ നവീകരണത്തിന് ആക്കം കൂട്ടിക്കൊണ്ടിരിക്കുന്നത് കാണാം. അതിർത്തി തർക്കങ്ങളിൽ ഏതു നിമിഷവും ഒരു കരയുദ്ദം പ്രതീക്ഷിക്കപ്പെടാവുന്നതാണ്.

അതേ പോലെ തന്നെ സമുദ്രാതിർത്തികളുടെ കാര്യവും എടുത്തു പറയേണ്ടതാണ്. സമുദ്രാതിർത്തികളുടെ പേരിൽ സംഘർഷങ്ങൾ ഇതുവരെ ഉടലെടുത്തിട്ടില്ലെങ്കിലും, ചൈനയുടെ ശ്രീലങ്കൻ ഇൻവെസ്റ്റ്മെന്റും അതിനു പിന്നിലുള്ള ഗൂഡ ലക്ഷ്യങ്ങളും സമീപ ഭാവിയിൽ തന്നെ ഇൻഡ്യൻ മഹാ സമുദ്രവും തർക്ക വേദികളിലൊന്നാവാം എന്ന സൂചനകൾ നൽകുന്നു. വലിയ തോതിൽ വിദേശ എണ്ണ ഇറക്കുമതി ചെയ്യുന്ന ചൈനയ്ക്ക്, ഏറ്റവുമധികം ഉപയോഗപ്പെടുന്നത് ഇൻഡ്യൻ മഹാ സമുദ്രമാണ്. ആയതിനാൽ സമുദ്രാതിർത്തികളിലെ ആധിപത്യം മുന്നിൽ കണ്ടുകൊണ്ട് ഡിഫൻസ് മിനിസ്ട്രി പുതിയ സ്ട്രാറ്റജി മെനയുന്നു. കാരണം സൈനീക പരമായി ഇൻഡ്യൻ മഹാ സമുദ്രത്തിലേക്ക് പെട്ടന്ന് എത്തിപ്പെടാൻ ചൈനയ്ക്ക് സാധിക്കില്ല. പീപ്പിൾസ് ലിബറേഷൻ ആർമിയുടെ നേവി ( PLAN) യ്ക്ക് ഇവിടേക്ക് എത്തണമെങ്കിൽ ഏഷ്യയുടെ തെക്ക് നിന്നും ആയിരക്കണക്കിന് മൈൽ ചുറ്റി യാത്ര ചെയ്യണം. നിലവിൽ ശ്രീലങ്ക പോലെ ഒരു തുറമുഖ ഇടത്താവളം അവർ ലക്ഷ്യമിടുന്നതിനു പിന്നിലെ കാരണം അതു തന്നെയാണ്..

അതിർത്തി യുദ്ദങ്ങൾ അവസാനിക്കുന്നില്ല.
_________________________________

കഴിഞ്ഞ ദശാബ്ദം മുതൽക്കുള്ള ഇൻഡ്യയുടെ കുതിപ്പിനെ ചൈന ഭയക്കുന്നുണ്ട്. പ്രത്യേകിച്ചും സ്ട്രാറ്റജി ഡെവലപ്മെന്റിൽ ഇൻഡ്യ പഴയ ഒരു ന്യൂട്രൽ സമീപനം വിട്ട് വ്യക്തമായ ലക്ഷ്യങ്ങളുമായി പോകുന്നതും അവർക്ക് ഭയമുളവാക്കുന്നു. അതുകൊണ്ട് തന്നെ നിരന്തരം പ്രകോപനങ്ങളുണ്ടാക്കി ഇൻഡ്യയെ ക്ഷീണിപ്പിക്കാൻ ശ്രമിക്കുന്നു. ചൈനയുടെ സൈനീക ഇടപെടലുകൾ പല വിധത്തിൽ ഇൻഡ്യയെ ബാധിച്ചു കൊണ്ടിരിക്കുന്നു. അതിന്റെ കാരണങ്ങളും വ്യക്തമാണ്.

ഇനിയും തീർച്ചപ്പെടുത്തിയിട്ടില്ലാത്ത ഇൻഡ്യൻ അതിർത്തിയിലെ, പ്രത്യേകിച്ചും ആക്ച്വൽ കണ്ട്രോൾ ലൈനിൽ ( Line of Actual Control (LAC)) അവർ ഒരിക്കലും സന്തോഷവാൻമ്മാരല്ല. അതിന്റെ പേരിലാണ് 62 ലെ യുദ്ദം മുതൽ ഇപ്പോൾ ദൗലത് ബാഗ് ഓൾഡിയിലും, അരുണാചൽ പ്രദേശിലുമെല്ലാം അവർ കടന്നു കയറുന്നത്. ചൈനയുടെ നിബന്ധനകൾക്കനുസൃതമായി ബോർഡർ തിട്ടപ്പെടുത്തിയാൽ, തർക്കത്തിലുള്ള എല്ലാ രാജ്യങ്ങളുമായും (ടിബറ്റ്, ജപ്പാൻ തുടങ്ങിയവ ഉദാഹരണം) അവർ സഹവർത്തിത്വത്തിന് സന്നദ്ദരാണ് എന്നത് ചൈനയുടെ ധാർഷ്ട്യത്തെയാണ് കാട്ടിത്തരുന്നത്.

അരുണാചലിലും ദൗലത്ബാഗ് ഓൾഡിയിലും പ്രകടിപ്പിക്കുന്ന സമീപനത്തിന് തികച്ചും വിരുദ്ദമായ ഒന്നാണ് അവർ പാക് അധീന കാശ്മീരിൽ പ്രകടിപ്പിച്ചു കൊണ്ടിരിക്കുന്നത്. സൗത്ത് ചൈന സമുദ്രത്തിലോ (നിരവധി അവകാശവാദങ്ങളിൽ പെട്ട ഒരു സമുദ്രഭാഗം) അരുണാചൽ പ്രദേശിലോ ഇൻഡ്യ ഏതെങ്കിലും വികസന പ്രോജക്ടുകൾ നടത്തിയാൽ ഉടൻ പ്രധിഷേധിക്കുന്ന ചൈന, Pakistan-Occupied Kashmir (PoK), China-Occupied Kashmir (COK) (mostly Aksai Chin in Ladakh) എന്നിവയുടെ കാര്യത്തിൽ നിശബ്ദത പാലിക്കുന്നു.
അരുണാചലിന്റെ വികസനം തടയുക, അതുവഴി അരുണാചൽ ജനതയെ അസംതൃപ്തരാക്കി ഒരു ഇൻഡ്യൻ വിരുദ്ദ മനോഭാവം സൃഷ്ടിക്കുക എന്നതൊക്കെയാണ് ചൈനയുടെ നിഗൂഡ ലക്ഷ്യങ്ങൾ. എന്നാൽ അവർക്ക് നിക്ഷേപങ്ങളുള്ള മേൽ പറഞ്ഞ ഇടങ്ങളിൽ അവർക്ക് പ്രധിഷേധമില്ല. കൂടാതെ ചൈനയിലെ വൻ മുസ്ലീം ഭൂരിപക്ഷ പ്രദേശമായ സിങ്ജിയാങിൽ (Xinjiang) ജിഹാദി ഇടപെടൽ തടയാൻ പാക് അധീന കാശ്മീരിലെ അവരുടെ നിലപാട് അവരെ സഹായിക്കും. കാരണം ഇൻഡ്യൻ സമ്മർദ്ദം മൂലം തീവ്രവാദികൾക്ക് കാശ്മീർ വിട്ട് സിങ്ജിയാങ്ങിലേക്ക് തിരിയാൻ കഴിയില്ല.

അതേപോലെ തന്നെ അതിർത്തി സംസ്ഥാനങ്ങളിലെ ഭീകരതയുടെ പശ്ചാത്തലത്തിൽ മറ്റൊരു കാര്യം കൂടി ചിന്തിക്കേണ്ടതുണ്ട്. സമീപ കാലത്ത് മണിപ്പൂരിലെ ഒളിയാക്രമണത്തിൽ 18 സൈനീകർ കൊല്ലപ്പെട്ടു. സമാനമായ ആക്രമണങ്ങൾ നാഗാലാൻഡിലും നടക്കുന്നു. അതേപോലെ തന്നെ എട്ട് അസം റൈഫിൾസ് ജവാന്മാർ അടുത്തകാലത്ത് കൂട്ടക്കൊല ചെയ്യപ്പെടുകയുണ്ടായി. പ്രസ്ഥുത ഇടങ്ങളിലെ ഭീകരതയിൽ ചൈനയ്ക്ക് നേരിട്ട് പങ്കുള്ളതായി ഇന്റലിജൻസ് ബ്യൂറോയും, റോയും ഗവണ്മെന്റിനെ അറിയിച്ചിട്ടുണ്ട്. കൂടാതെ ഷേക് ഹസീനയുടെ ബംഗ്ലാദേശ്, വിധ്വംസക ശക്തികൾക്കെതിരേ ഇൻഡ്യയ്ക്കൊപ്പം യോജിച്ച് പ്രവർത്തിക്കുന്നത് ചൈനയെ അലോസരപ്പെടുത്തുന്നു.

അതിർത്തി കയ്യേറാനുള്ള ശ്രമം ചൈന തുടരുമ്പോൾ, നമ്മുടെ ജവാൻമ്മാർ പട്രോളിങ് ശക്തമാക്കുന്നു. 2013 ഓഗസ്റ്റിൽ അരുണാചൽ പ്രദേശിലെ തവാങ് കടന്നു കയറിയ ചൈന, മേഘയിൽ ഒരു ആപത്ത് സംജാതമാകുന്ന നഗ്നമായ സൂചന തന്നെ നൽകിക്കഴിഞ്ഞു. അന്ന് ആദ്യമായി ചൈനീസ് സൈനികർ ഇന്ത്യൻ റീജിയണിൽ പെട്ട ഒരു ബൗണ്ടറി മതിൽ പൊളിക്കാൻ ശ്രമിച്ചു .
*ചൈന മതിൽ പൊളിക്കാൻ കടന്ന വീഡിയോ താഴെ കമന്റുകളിലൊന്നിൽ ഇട്ടിട്ടുണ്ട്.
ഇവയൊക്കെ സൂചിപ്പിക്കുന്നത്, ചൈന ഇന്ത്യയുമായി മറ്റൊരു ഹ്രസ്വ യുദ്ധമോ അതിനപ്പുറമോ വ്യക്തമായി പ്ലാൻ ചെയ്യുന്നുണ്ടാവാം എന്നാണ്. നാം എപ്പോഴും ചൈനയുടെ ഒരു ആക്രമണത്തിന് അലർട്ടായിരുന്നേ പറ്റൂ.

62 ലെ യുദ്ദത്തിൽ അക്സായ് ചിൻ ലൈനിന് സമ്മതം പറഞ്ഞ ചൈന ഇന്ന് അതിനെ എതിർക്കുന്നു. എന്തെന്നാൽ ടിബറ്റ് അധിനിവേശം പൂർണമാകണമെങ്കിൽ ചൈനയ്ക്ക് അരുണാചലും വേണം. ഒപ്പം ഒരു യുദ്ദത്തിൽ മേധാവിത്വം നേടാനുതകുന്ന രീതിയിലുള്ള ഇൻഡ്യൻ അതിർത്തിയിലെ കീഴ്ക്കാം തൂക്കായ അതിർത്തി ഭൂപ്രദേശം അവരെ നിരാശരാക്കുന്നു. സാറ്റലൈറ്റ് ക്യാമറകളിലൂടെ എടുത്ത ഇൻഡ്യൻ അതിർത്തി പ്രദേശങ്ങൾ കവർച്ച ചെയ്യണം എന്ന വാശിയിലാവാം അവർ.
അരുണാചലിലെ തവാങ്ങ് കീഴടക്കിയിട്ട്, ഒരു മഹാമനസ്കത പോലെ മറ്റ് പ്രദേശങ്ങളിൽ ഒരു നിരുപാധിക ഒത്തു തീർപ്പുണ്ടാക്കാൻ ഇൻഡ്യയ്ക്ക് മേൽ സമ്മർദ്ദം ചെലുത്താൻ കഴിഞ്ഞേക്കാം എന്ന് അവർ കണക്കു കൂട്ടുന്നു.

ചൈനയെ ഭയപ്പെടുത്തുന്നത് എന്ത്?
____________________________

എന്നാൽ ഇൻഡ്യ പഴയതിൽ നിന്ന് ഒട്ടേറെ പാഠങ്ങൾ ഉൾക്കൊണ്ടിരിക്കുന്നു. അതിർത്തി പ്രശ്നങ്ങളിൽ ഉദാരവത്കരണം നടത്തുന്ന നമ്മുടെ സമീപനം എന്നേ നാം കുഴിച്ചു മൂടിയിരിക്കുന്നു. ഭാരതത്തിന്റെ ഒരു തരി മണ്ണ് നമുക്കിനി ഒരാൾക്കും വിട്ടു കൊടുക്കാനാവില്ല. ഇത്തരം സംഘർഷ സാഹചര്യങ്ങളെ സമർഥമായി പ്രതിരോധിക്കാൻ സൈനീകപരമായി നാം മുന്നേറ്റത്തിന്റെ പാതയിലാണ്.
യുദ്ദ സൈദ്ദാന്തികരുടെ കണ്ടെത്തൽ അനുസരിച്ച് നിലവിൽ ചൈനയെ ഭയപ്പെടുത്താനുതകുന്ന ചില സൈനീക മേഖലകളിൽ നാം വ്യക്തമായ ഒരു റൂട്ടിലാണ്. അവയിൽ പ്രധാനപ്പെട്ടവ താഴെ കൊടുക്കുന്നു.

1. വിക്രമാദിത്യ വിമാനവാഹിനിക്കപ്പലുകൾ (VIkramaditya Aircraft Carrier) :-

1961 ൽ കമ്മീഷൻ ചെയ്ത INS വിക്രാന്ത് ആണ് ഇൻഡ്യയുടെ ആദ്യ എയർക്രാഫ്റ്റ് കരിയർ. 2013 ൽ കമ്മീഷൻ ചെയ്ത ഐ എൻ എസ് വിക്രമാദിത്യ നിലവിൽ മറ്റു സൂപ്പർ പവറുകളുടെ വിമാനവാഹിനി കപ്പലുകളോട് കിടപിടിക്കാവുന്ന വിധം സജ്ജമാണ്.

സോവിയറ്റ് ചുവയുള്ള ഐ എൻ എസ് വിക്രമാദിത്യ, ശത്രുക്കളുടെർ മുങ്ങിക്കപ്പലുകൾ കണ്ടെത്തി നശിപ്പിക്കുന്ന ഒന്നാണ്. 1996 കളിൽ റഷ്യ ക്ഷുദ്രശക്തികളെ നിർമാർജ്ജനം ചെയ്യാൻ ഉപയോഗിച്ചിരുന്ന ഇത് 2004 ലാണ് ഇൻഡ്യ വാങ്ങുന്നത്. വിക്രമാദിത്യയിൽ മുപ്പത് MiG-29K, അല്ലെങ്കിൽ അത്ര തന്നെ തേജസ് ഫൈറ്റർ വിമാനങ്ങൾ, 12 ഹെലികോപ്ടറുകൾ എന്നിവ ഉൾക്കൊള്ളും. വിക്രമാദിത്യയ്ക്ക് വേണ്ടുന്ന പുതിയ ചില അപ്ഡേഷനുകൾ ഇസ്രായേലുമായി ചേർന്ന് പ്രൊഗ്രാം ചെയ്യുകയുണ്ടായി.സമുദ്രത്തിൽ നമുക്ക് ചൈനയെ ഭയക്കേണ്ട കാര്യമില്ല. കാരണം INS വിക്രമാദിത്യ ഇന്ത്യൻ മഹാ സമുദ്രത്തിൽ തീർച്ചയായും കാവലിനുണ്ട്.

2. അഞ്ചാം തലമുറ യുദ്ദവിമാനങ്ങൾ. (Fifth Generation Fighter Aircraft - FGFA) :-

രൂപകൽപ്പന ചെയ്യപ്പെട്ടുകൊണ്ടിരിക്കുന്ന ഇന്ത്യയിലെ ആദ്യത്തെ അഞ്ചാം തലമുറ ഫൈറ്റർ വിമാനം ആണ് FGFA. ഹിന്ദുസ്ഥാൻ എയ്റോനോട്ടിക്സ് ലിമിറ്റഡ് + റഷ്യൻ സുഖോയ് കോർപ്പറേഷൻ എന്നിവയുടെ ഒരു സംയുക്ത സംരംഭം. സൈദ്ധാന്തികമായി അമേരിക്കൻ F-22 , ചൈനീസ് J-20 ഗണത്തിൽ പെടുത്താവുന്ന ഒന്നാണിത്. മൾട്ടി റോളുകളിലുള്ള വിമാനമാണിത്. ആകാശത്തിലെ ശത്രുവിനെ ആകാശത്ത് വെച്ചും, ആകാശത്തു നിന്നും ഭൂമിയിലേക്കും ഇതിനു ആക്രമിക്കാൻ കഴിയും. ഫിഫ്ത് ജനറേഷൻ പോരാളികളുടെ എല്ലാ ഗുണഗണങ്ങളും ഇതിനുണ്ട്. കരയിലും കടലിലും ടാർഗെറ്റുകൾ ആക്രമിക്കാൻ കഴിയുന്ന ബ്രഹ്മോസ് സൂപ്പർസോണിക് ക്രൂയിസ് മിസൈൽ വഹിക്കാൻ ശേഷിയുണ്ട്. 30 ബ്ലില്ല്യൺ യു എസ് ഡോളർ ചിലവഴിക്കുന്ന ഈ സംയുക്ത സംരംഭം, 2020 - 2022 ൽ ലോഞ്ച് ചെയ്യും എന്ന് പ്രതീക്ഷിക്കുന്നു. ഇവയുടെ ഡിസൈൻ, സാങ്കേതികത എന്നിവയിലെ പൂർണത സംബന്ധിച്ച് നിലവിൽ ചില സംശയങ്ങളുന്നയിക്കപ്പെട്ടിട്ടുണ്ട്. എന്നാൽ സുഖോയ് ഡിസൈൻ ബ്യൂറോയുടെ 70 വർഷത്തെ പാരമ്പര്യത്തിൽ ഇൻഡ്യ പ്രതീക്ഷ അർപ്പിക്കുന്നു.

വിദേശ സാങ്കേതിക വിദ്യ ഉപയോഗിച്ച് തികച്ചും തദ്ദേശീയമായി രൂപ കൽപ്പന ചെയ്തതാണ് ചൈനയുടെ J-20. ഇൻഡ്യയുടെ FGFA ഒരു വിജയമായി തീർന്നാൽ ആസന്ന ഭാവിയിൽ തന്നെ ആകാശ മേൽക്കോയ്മയിൽ ചൈനയുടെ മേൽ തികച്ചും ഒരു ആധിപത്യം സ്ഥാപിക്കാനാകും എന്ന് നിസംശയം പറയാം.

3. ബ്രഹ്മോസ് മിസൈൽ. (BrahMos Anti-Ship Missile) :-

റഷ്യയുമായി ചേർന്ന് വികസിപ്പിച്ച ഷോർട്ട് റേഞ്ച് സൂപ്പർസോണിക് ക്രൂയിസ് മിസൈലാണ് ബ്രഹ്മോസ്. കര ആകാശം കടൽ തുടങ്ങി എവിടെ വെച്ചും വിക്ഷേപിക്കാൻ സാധിക്കും.കരയിലോ സമുദ്രത്തിലോ കൃത്യതയോടെയുള്ള ടാർഗറ്റു നേട്ടങ്ങൾക്ക് കഴിവുള്ള ലോകത്തിലെ ഏറ്റവും വികസിത മിസൈലുകളിൽ ഒന്നാണ് ബ്രഹ്മോസ്.

ഇൻഡ്യയിലൂടെ ഒഴുകുന്ന Brahmaputra, റഷ്യയിലൂടെ ഒഴുകുന്ന Moskva എന്നീ രണ്ടു നദികളുടെ പേരുകൾ കൂട്ടിയോജിപ്പിച്ച് ഇട്ടതാണ് ബ്രഹ്മോസ് എന്ന പേര്. 440 മുതൽ 660 വരെ പൗണ്ട് ഭാരമുള്ള ആയുധ ശേഖരങ്ങൾ വഹിക്കാൻ കഴിവുള്ള ബ്രഹ്മോസ് മിസൈലിന്, സാഹചര്യങ്ങൾക്കനുസൃതമായി 186 മുതൽ 310 മൈലുകൾ വരെ ദൂര പരിധിപ്രാപിക്കാനാവും.

ചൈനയുടെ പീപ്പിൾസ് ലിബറേഷൻ ആർമിയ്ക്കെതിരേ ബ്രഹ്മോസ് ഗണ്യമായ ഒരു പ്രധിരോധം തീർക്കുന്നു. ഒരു ചൈനീസ് കര, നാവീക ആക്രമണത്തിന്റെ വേഗത ഇതുവരെ പരീക്ഷിക്കപ്പെട്ടിട്ടില്ലെങ്കിലും അതിനെ പ്രധിരോധിക്കാൻ ഫലപ്രഥമാണ് ബ്രഹ്മോസ് എന്ന് യുദ്ദ സൈദ്ദാന്തികർ അനുമാനിക്കുന്നു.

4. കൊൽക്കത്താ ക്ലാസ് സംഹാരക്കപ്പൽ (Kolkata-Class Destroyer) :-

വേഗത + കരുത്ത്, കരയിലും കടലിലും ആക്രമണം നടത്താനുള്ള ശേഷി തുടങ്ങിയ കാര്യങ്ങളിൽ, ഇൻഡ്യൻ നേവിയുടെ കൊൽക്കത്താക്ലാസ് പടക്കപ്പലുകൾ പ്രബലമായ ഒന്ന് തന്നെയാണ്. Multipurpose Destroyers ആണ് ഇവ. ഇൻഡ്യയുടെ എയർക്രാഫ്റ്റ് കരിയറുകൾക്ക് സംരക്ഷണം നൽകാവുന്ന വിധം സ്വതന്ത്രമായി പ്രവർത്തിക്കുക എന്നതാണ് ഇവയുടെ പ്രധാന ദൗത്യങ്ങളിലൊന്ന്. റഡാർ സംവിധാനങ്ങൾ കൃത്യമായി കണ്ടെത്താനും, ഒപ്പം റഡാർ ഗൈഡഡ് മിസൈലുകൾക്ക് തൽക്ഷണം നിർദേശം നൽകാനും, മുങ്ങിക്കപ്പലുക്കളെ കൃത്യമായി കണ്ടെത്താനും നിലവിൽ ഇവയ്ക്ക് കഴിയും. 16 ബ്രഹ്മോസ് സൂപ്പർസോണിക് ക്രൂയിസ് വിമാനങ്ങളെ വഹിക്കാൻ പ്രാപ്തമായ കൊൽക്കത്താ ക്ലാസ് പടക്കപ്പലുകൾ ലോകത്തെ ഏതൊരു നാവീക സേനയോടും ജലോപരിതലത്തിൽ വെച്ച് എതിരിടാൻ കെൽപ്പുള്ള ഒന്നാണ്. ഈ ക്ലാസിൽ പെട്ട നാലു കപ്പലുകൾ കൂടി നിലവിൽ പ്ലാൻ ചെയ്യുന്നുണ്ട്.

5. ആണവ അന്തർവാഹിനികൾ (Arihant-Class Ballistic-Missile Submarine) :-

ദശാബ്ദങ്ങളായി ഇൻഡ്യ ഒരു ആണവ ശക്തിയാണെങ്കിലും അതിന്റെ കാര്യപ്രാതിയുടെ വിശ്വസനീയതയേക്കുറിച്ച് ആർക്കും ഒന്നും അറിയില്ല.
മഹാനഗരങ്ങളിലേക്ക് ശത്രു ലക്ഷ്യമിട്ടാലോ, ഒരു അപ്രതീക്ഷിത ന്യൂക്ലിയർ ആക്രമണത്തിന് ആരെങ്കിലും ഒരുമ്പെട്ടാലോ, ശത്രുവിനുള്ള പുനർവിചിന്തനത്തിനായി ഒരു സർപ്രൈസായി വെച്ചിരിക്കുന്ന ഒന്നാണ് നമ്മുടെ ആണവായുധങ്ങൾ.

ഇന്ത്യ ഒരു ആഴക്കടൽ ആണവ ആക്രമണ ശക്തിയുള്ള ലോകത്തിലെ ആറാമത്തെ രാജ്യമാകാനുള്ള ഡെവലപ്മെന്റിലാണ്. Arihant പ്രത്യേകമായി ആണവ മിസൈലുകൾ വിക്ഷേപിക്കാനുള്ള ഇന്ത്യയിലെ ആദ്യ "ബാലിസ്റ്റിക് മിസൈൽ അന്തർവാഹിനി" ആണ് . പന്ത്രണ്ടോളം K-15 ഷോർട്ട് റേഞ്ച് ന്യൂക്ലിയർ മിസൈലുകളും, നാല് K-4 ഇന്റർമീഡിയറ്റ് റേഞ്ച് ന്യൂക്ലിയർ മിസൈലുകളും വഹിക്കാൻ ഉതകുന്ന ഒന്നാണിത്. K-15 മിസൈലുകൾക്ക് ഇന്ത്യൻ മഹാ സമുദ്രത്തിൽ നിന്ന് 700 കിലോമീറ്റർ ദൂര പരിധി ഉണ്ട്. ചൈനയിലെ 3500 കിലോമീറ്റർ ദൂരം വരെ പോകാവുന്ന IRBM മിസൈലുകളും Arihant നു വഹിക്കാനാവും. ഭാരതത്തിന്റെ ആദ്യ തദ്ദേശീയ "ബാലിസ്റ്റിക് മിസൈൽ വാഹക അന്തർവാഹിനി" ആണിത്.

ചൈനയ്ക്ക് പക്ഷേ അറിഹന്റിനെ തൽക്കാലം ഭയപ്പെടേണ്ട കാര്യമില്ല. കാരണം ആദ്യം ആണവായുധം ഉപയോഗിക്കില്ല എന്ന കരാറിലുള്ള ഒരു പ്രബല രാജ്യമാണിന്ത്യ. എന്നാൽ ഇന്ത്യയ്ക്കെതിരേ അങ്ങനെ ഒരു നീക്കമുണ്ടായാൽ പോലും, ആ നയം മാറ്റാൻ ഉതകുന്ന വിജയകരമായ ഒന്നാണ് Arihant Class. പന്ത്രണ്ടോളം ആണവ മിസൈലുകൾ ഇവയിൽ വിന്യസിക്കാം. ഇതേ വിഭാഗത്തിൽ പെട്ട മൂന്നു മുങ്ങിക്കപ്പലുകൾ കൂടി പ്ലാൻ ചെയ്തിരിക്കുന്നു

6. ബാലിസ്റ്റിക് മിസൈലുകൾ. (Intermediate-Range Ballistic Missile) :-

2015 Jan. 31.
ബേ ഓഫ് ബംഗാളിലെ വീലേർസ് ഐലന്റിൽ നിന്നും ഇൻഡ്യയുടെ ആദ്യത്തെ ലോങ് റേഞ്ചർ ബാലിസ്റ്റിക് മിസൈൽ, AGNI V വിജയകരമായി പരീക്ഷിക്കപ്പെട്ടു.
ബെയ്ജിങ്ങ് ഉൾപ്പെടെ (ബെയ്ജിങ്ങോ, ഷാങ്ഹായിയോ മാത്രമല്ല) ചൈനയിലെ ഏത് മഹാ നഗരത്തിലെയും ടാർഗറ്റുകളിലേക്ക് AGNI V യ്ക്ക് കൃത്യമായി എത്തിച്ചേരാൻ കഴിയും.

അഗ്നി 5 ഒരു IRBM മിസൈലാണ്. (Intermediate-Range Ballistic Missile).
ഒരു ടൺ ഭാരവുമായി 5000 കിലോമീറ്ററുകൾ ഇത് സഞ്ചരിക്കും. "India's 'Beijing Killer' Missile" എന്നാണ് വാർ തീയറിസ്റ്റുകൾ അഗ്നിയെ വിലയിരുത്തുന്നത്. അഗ്നി 5 ന്റെ 5000 കിലോ മീറ്റർ പ്രഹര പരിധിയ്ക്ക് ഏറെക്കുറേ ഏഷ്യ, നോർത്ത് ആഫ്രിക്കയുടെ നല്ലൊരു ഭാഗം, കിഴക്കൻ യൂറോപ്പ്, റഷ്യയുടെ ചില ഭാഗങ്ങൾ എന്നിവയൊക്കെ സാധ്യമായ ഡിസ്റ്റൻസാണ്.

നിലവിൽ ചൈന ഇക്കാര്യത്തിൽ നമ്മേക്കാൾ ബഹുദൂരം മുന്നിലാണ്. ഇൻഡ്യയുടെ ഏതു ഭാഗത്തും എത്താവുന്ന ICBM (Inter Continental Ballistic Missile) മിസൈലുകൾ അവർക്കുണ്ട്.

7. വരുന്നൂ, ഇൻഡ്യയുടെ ആദ്യ ഭൂഘണ്ടാന്തര ബാലിസ്റ്റിക് മിസൈൽ. :-

ഇൻഡ്യയുടെ, പി.എസ്.എൽ.വി റോക്കറ്റുകളുപയോഗിച്ചുള്ള ബഹിരാകാശ പരീക്ഷണങ്ങളെ നിരീക്ഷിച്ചിരുന്ന പെന്റഗൺ, ഇന്റർ കോണ്ടിനെന്റൽ ബാലിസ്റ്റിക് മിസൈലുകളിലേക്ക് ഇന്ത്യ അതിവേഗം അടുക്കുന്നു എന്ന് നേരത്തേ തന്നെ സംശയം ഉന്നയിച്ചിരുന്നു. അഗ്നി 5 അതിന്റെ തുടക്കം മാത്രമായിരുന്നു. ( മുൻപ് റഷ്യ അമേരിക്കാ പോസ്റ്റിൽ, സാറ്റലൈറ്റ് പരീക്ഷണങ്ങളധികവും മിലിട്ടറി പർപ്പസിനു വേണ്ടിയാണ് എന്ന് എഴുതിയിരുന്നു. ദീർഖദൂര മിസൈലുകളുടെ പ്രവർത്തന ക്ഷമത പരീക്ഷിക്കാൻ ഇന്ന് ആകെയുള്ള മാർഗ്ഗം സ്പേസിലേക്കും മറ്റും റോക്കറ്റുകൾ അയക്കുക എന്നതാണ്.)

2015 ഏപ്രിലിൽ ദീർഖകാല അഭ്യൂഹങ്ങൾക്ക് വിരാമമിട്ടു കൊണ്ട്, DRDO ((Defence Research and Development Organization) ) യുടെ Armament Research Board ചെയർമാനായ S.K. Salwan ആ വിവരം പുറത്തു വിട്ടു. ഇൻഡ്യ ഒരു ICBM ന്റെ പണിപ്പുരയിലാണ്. 2017 ൽ ഇത് പരീക്ഷണം നടത്തിയേക്കും.

സൂര്യ എന്ന കോഡ്നെയിമിട്ടിട്ടുള്ള Agni VI - ICBM ഇപ്പോൾ ഗർഭാവസ്ഥയിലാണ്. യൂറോപ്പ്, ഏഷ്യ, ആഫ്രിക്ക & ഓഷ്യാനിയ എന്നിവിടങ്ങളിലേക്ക് ഇതിനു പ്രഹര ശേഷിയുണ്ടാവും. കൂടാതെ അലാസ്കാ, നോർത്തേൺ കാനഡ എന്നിവിടങ്ങളിലേക്ക് ടാർഗറ്റ് കണ്ടെത്താനുമാവും. എന്നാൽ യുണൈറ്റഡ് സ്റ്റേറ്റ്സ് , സൗത്ത് അമേരിക്ക തുടങ്ങിയ ഭൂഖണ്ഡങ്ങളിലേക്ക് ഇതിന് എത്തിച്ചേരാനാവുമോ എന്ന് സംശയമുണ്ട്. എന്നാൽ വളരെ അകലെയുള്ള ഒരു ടാർഗറ്റ് ലക്ഷ്യമിടുന്ന, കൂടുതൽ മികച്ച ഭൂഘണ്ടാന്തര ബാലിസ്റ്റിക് മിസൈലുകളിലേക്ക് അധികം വൈകാതെ എത്തിയേക്കാം.

വിക്കി പീടിയയിൽ ഇങ്ങനെ കാണുന്നു.
Agni-VI (Under Development):
is a ICBM with a range of 8,000-10,000 km and is expected to enter service in 2018.

എന്തുകൊണ്ട് നാം ICBM നിർമ്മിക്കുന്നു?
_______________________________

ചേരിചേരാ പ്രസ്ഥാനത്തിന്റെ ഉപജ്ഞാതാക്കളായിരുന്നു ഇന്ത്യ. എന്നാൽ അതിനെ ചോദ്യം ചെയ്തു കൊണ്ടാണ് 1962 ൽ ചൈനീസ് ആക്രമണം സംജാതമായത്. എങ്കിലും ഇന്നും നാം പഴയ ചേരിചേരാ പ്രസ്ഥാനത്തോട് അടുത്തു നിൽക്കുന്ന ഒരു ന്യൂട്രൽ സമീപനമാണ് അനുവർത്തിച്ചു പോരുന്നത്. ഇനി ഒരു ലോക മഹായുദ്ദമുണ്ടായാൽ അത്തരം ന്യൂട്രാലിറ്റി കൊണ്ട് പ്രത്യേകിച്ച് കാര്യമുണ്ടെന്ന് തോന്നുന്നില്ല. ഇൻഡ്യയ്ക്കും ഭാഗഭാക്കാകെണ്ടി വരാം. സ്വഭാവികമായും നിലവിലെ ശാക്തിക ചേരികൾ വെച്ച് അമേരിക്ക എതിരായി വരാനുള്ള സാധ്യത വളരെ കൂടുതലാണ്. അത്തരം ഒരു അവസ്ഥയെ നാം ഇപ്പോഴേ മുൻകൂട്ടി കാണേണ്ടതുണ്ട്. ബെയ്ജിങ് വരെ എത്താവുന്ന IRBM മിസൈലിൽ നിന്നും ഭൂഘണ്ടങ്ങൾ താണ്ടാവുന്ന ഒരു ICBM മിസൈൽ അതുകൊണ്ടു തന്നെ നമുക്ക് ആവശ്യമാണ്.

പ്രശസ്ഥമായ ഒരു പഴയകാല സംഭവം ഇൻഡ്യൻ സൈന്യത്തിന് മുന്നിൽ എപ്പോഴും ഒരു അനുഭവപാഠമായി ഇരിപ്പുണ്ട്.
1971 ലെ ഇൻഡോ പാക്ക് യുദ്ധം.
ഇന്ത്യയുടെ കരസേന, നാവികസേന , വ്യോമസേന എന്നിവയുടെ ക്ലിനിക്കൽ പ്രൊഫഷണലിസം, ലോകത്തിനു ആദ്യമായി ബോധ്യമായ കാലം. അന്ന് പാക്കിസ്ഥാനെ സപ്പോർട്ട് ചെയ്യുന്ന രാജ്യമായിരുന്നു യുണൈറ്റഡ് സ്റ്റേറ്റ്സ്.
റിച്ചാർഡ് നിക്സൺ ആയിരുന്നു അമേരിക്കൻ പ്രസിഡന്റ്. യുദ്ധത്തോടനുബന്ധിച്ച് അമേരിക്ക മൂന്ന് ബറ്റാലിയൻ മറീനുകളെ ഇൻഡ്യൻ സമുദ്രത്തിൽ ഒരു നിരീക്ഷണത്തിനു വിട്ടു. അതിനേത്തുടർന്ന് യു.എസ്.എസ് എന്റർപ്രൈസസ് എന്ന പടക്കപ്പൽ ഇൻഡ്യൻ മഹാ സമുദ്രത്തിൽ നമ്മെ ഭീതിപ്പെടുത്തിക്കൊണ്ടിരുന്നു...

കാലം ഇന്നൊരുപാട് കഴിഞ്ഞെങ്കിലും യുദ്ധ തത്വം അനുസരിച്ച് ആരും ആരേയും വിശ്വസിച്ചു കൂടാ എന്ന ഒന്നുണ്ട്. നാളെ കാശ്മീർ വിഷയത്തിൽ അമേരിക്കൻ നിലപാട് ഒരുപക്ഷേ മാറിയേക്കാം. അമേരിക്കൻ നിലപാടുകൾ എപ്പോഴും അവരുടെ സ്വാർഥ താല്പര്യങ്ങളെ മാത്രം ആശ്രയിച്ചാണിരിക്കുന്നത്. അതിനാൽ നമുക്ക് ഒരു മുൻ കരുതൽ കൂടിയേ തീരൂ. 1971 ലെ ഇൻഡ്യൻ സമുദ്രാതിർത്തിയിലുണ്ടായ ആ സംഭവത്തിൽ നിന്നുള്ള തിരിച്ചറിവാണ് നമ്മെ ഇന്നൊരു ബാലിസ്റ്റിക് മിസൈലിന്റെ അനിവാര്യതയിലേക്ക് എത്തിച്ചത്. 10,000 മുതൽ 15,000 കിലോമീറ്റർ വരെ ദൂര പരിധിയുള്ള ഒരു ഇന്റർ കോണ്ടിനെന്റൽ ബാലിസ്റ്റിക് മിസൈൽ, വരുന്ന ദശാബ്ദത്തിൽ തന്നെ നമ്മുടെ സൈന്യം സ്വന്തമാക്കും.

ഉപസംഹാരം
___________

സൂപ്പർ പവറായ ചൈനയ്ക്ക്, യു.എസ് ഉൾപ്പെടെ ആരുമായും ഒരു ഏറ്റുമുട്ടൽ ഭീതി നിലവിലുണ്ട്. ഇൻഡ്യയ്ക്ക് പൊതുവിൽ പാക്കിസ്ഥാൻ, ചൈന എന്നിവരല്ലാതെ പറയത്തക്ക എതിരാളി ഇപ്പോഴില്ല. ബീജിങ്ങ്, ഷാങ്ഹായ് എന്നിവയും, കൂടാതെ പാക്കിസ്ഥാൻ മുഴുവനായും കവർ ചെയ്യാവുന്ന ദൂര പരിധിയിലുള്ള മിസൈലുകൾ തൽക്കാലം നമുക്കുണ്ട്. ഇത്തരം ഒരവസ്ഥയിൽ ഒരു മുഴുനീള ബലാബലത്തിന് ചൈനയോ പാക്കിസ്ഥാനോ തൽക്കാലം നിൽക്കാൻ സാധ്യതയില്ല.

1962 ലെ യുദ്ദത്തിൽ ചൈനയോട് നേരിട്ട പരാജയത്തിൽ നിന്നും അര നൂറ്റാണ്ട് കഴിഞ്ഞിരിക്കുന്നു. നിലവിലെ ഇൻഡ്യൻ മിലിട്ടറി സ്ട്രാറ്റജി ഏറെ മുന്നോട്ട് പോയിരിക്കുന്നു. എങ്കിലും ഒരു ഇൻഡോ - സിനോ വാർ സാധ്യത എപ്പോഴും നില നിൽക്കുന്നു. നമ്മുടെ പ്രധിരോധ ബജറ്റ് വർദ്ദിപ്പിച്ച് കാലഘട്ടാനുസൃതമായ അപ്ഡേഷനുകളോടെ പുതിയ ആയുധങ്ങൾ നാം നേടിയേ തീരൂ. ഇൻഡ്യയിലേക്ക് കടന്നു കയറാൻ ശ്രമിക്കുന്ന ശത്രുവിനെ, വാതിൽക്കൽ വെച്ച് ദൗത്യം ഉപേക്ഷിച്ച് തിരിച്ച് പോകാൻ പ്രേരിപ്പിക്കുന്ന ഒരു സൈനീക ശാക്തികത നമുക്കുണ്ടായേ തീരൂ.
ആരേയും ആക്രമിക്കാനല്ല, സ്വയ രക്ഷയ്ക്ക് വേണ്ടി മാത്രം!
ജയ് ഹിന്ദ്.
ഭാരത് മാതാ കീ ജയ്!!!

________________________________

ഒപ്പം കൊടുത്തിട്ടുള്ള ചിത്രം - INS VIKRAMADITYA.

കൂടുതൽ ചിത്രങ്ങൾ ആദ്യ കമന്റുകളിൽ കാണാം.

പ്രധാന വസ്തുതകൾക്കുള്ള കടപ്പാട് :
വിക്കി പീഡിയ, ദി നാഷണൽ ഇന്ററെസ്റ്റ്, ദി ഡിപ്ലോമാറ്റ്, Kyle Mizokami, Zachary Keck, Manish Acharya, Ankit Panda

കവചിത ഇൻഡ്യയുടെ കാലികപ്രസക്തി

അഗ്നി അഞ്ചിന്റെ വിക്ഷേപണവുമായി ബന്ധപ്പെട്ട ചില യാധാർഥ്യങ്ങളിലേക്കുള്ള ഒരു യാത്രയാണീ പോസ്റ്റ്. സമകാലിക ഇന്ഡ്യൻ പ്രതിരോധത്തിന് മേലേയുളള ആശങ്കകളും,  ചൈനീസ് ഭീക്ഷണിയും  അതിർത്തി കടന്ന് മഹാമേരു പോലെ നമ്മെ തുറിച്ച് നോക്കിക്കൊണ്ടിരിക്കുന്നു. ഇന്ന് ലോക രാജ്യങ്ങളിൽ ആരിൽ നിന്നെങ്കിലും നമുക്ക് ശക്തമായ ഭീക്ഷണി ഉയരുന്നുണ്ടെങ്കിൽ അത് ചൈനയിൽ നിന്ന് മാത്രമാണ്.

അസമിനും അരുണാചൽ പ്രദേശിനും വേണ്ടി പിടിമുറുക്കുന്ന ചൈനയുടെ ശാക്തിക നയങ്ങൾ, നമ്മുടെ രാജ്യത്തെ വരിഞ്ഞു കെട്ടിക്കൊണ്ടിരിയ്ക്കുന്നു.  മംഗോളിയൻ വംശജർ ഭൂരിപക്ഷം വരുന്ന സിക്കിം തുടങ്ങിയ  അതിർത്തി സംസ്ഥാനങ്ങളിൽ ചൈനീസ് കളി,  മാതാഹരി നടത്തിയ ചാര പ്രവർത്തനങ്ങളേക്കാൾ വലുതാണ്.  ഇൻഡ്യൻ മഹാ സമുദ്രത്തിന്റെ അർദ്ധ ഭാഗത്തോളം ശ്രീ ലങ്കയിൽ താവളമുറപ്പിച്ച് ഇപ്പോൾ തന്നെ പിടിച്ചടക്കിയിരിക്കുന്ന ചൈനീസ് ഗവണ്മെന്റ്, ഇൻഡ്യൻ ഭൂ പ്രദേശത്തിനെ നാലു ചുറ്റും വളഞ്ഞ മട്ടാണ്. 

തർക്ക പ്രദേശങ്ങളുടെ കാര്യം വരുമ്പോൾ സ്വന്തം രാജ്യത്തിന്റെ മാപ്പിന്റെ കൃത്യത ചിലപ്പോൾ തെറ്റായി കാണിക്കുന്നുണ്ടാവാം. പാക്കിസ്ഥാനിലെ പഞ്ചാബ് ഇന്നും ഇൻഡ്യയുടേതാണെന്ന് നമ്മൾ പറയാറുണ്ട്. അരുണാചലിനെ ചൈനീസ് മാപ്പിൽ അവർ കാണിയ്ക്കുമ്പോൾ അതേ അരുണാചല് ഇൻഡ്യൻ മാപ്പിൽ നമ്മുടെ ഭാഗമാണ്. ടിബറ്റ് ചൈനയുടേതാണെന്ന് അവർ അവകാശപ്പെടുമ്പോൾ, ടിബറ്റ് സ്വതന്ത്ര രാജ്യമണെന്ന് ഇൻഡ്യ ആവർത്തിക്കുന്നു. ജപ്പാന്റെ ചില ദ്വീപ സമൂഹങ്ങളെ ചൈന അവരുടേതെന്ന് മാപ്പിൽ കാണിയ്ക്കുമ്പോൾ, ജപ്പാന്റെ മാപ്പിൽ, അതേ ദ്വീപുകൾ സ്വന്തമായിത്തന്നെയിരിക്കുന്നു. 

ഫോക് ലാന്റ് ദ്വീപുകൾക്ക് വേണ്ടി അർജന്റീനയും ബ്രിട്ടണും പണ്ട് ഏറ്റു മുട്ടിയതാണ്. അർജന്റീനയുടെ ഫോക് ലാന്റ് ദ്വീപുകൾ ബ്രിട്ടന്റേതാണെന്ന് ബ്രിട്ടൻ അവകാശപ്പെട്ടിടത്ത് തുടങ്ങിയ തർക്കമായിരുന്നു അത്. തർക്ക പ്രദേശങ്ങൾ ലോകത്ത് എവിടെയും ഒന്ന് പോലെ തന്നെയാണ്. അതുകൊണ്ട് മാപ്പിന്റെ ആധികാരികത, പഞ്ചായത്തായാലും, മുനിസിപ്പാലിറ്റിയായാലും, ലോക രാഷ്ട്രങ്ങളായാലും അതങ്ങനെ തന്നെ തുടരും.


തർക്കത്തിലുണ്ടെന്ന് അവർ വരുത്തി തീർക്കാൻ ശ്രമിക്കുന്ന പ്രദേശങ്ങളിൽ അവരുടെ അവകാശ വാദം ഉറപ്പിക്കാൻ ചൈന ചില പ്രത്യേക നടപടികൾ ആവിഷ്ക്കരിയ്ക്കാറുണ്ട്. അതിലൊന്ന്,  വർഷാ വർഷം അരുണാചൽ പ്രദേശിലെ ഇൻഡ്യൻ അതിർത്തിയിലേക്ക് ഒന്നര കിലോ മീറ്ററോളം നെഞ്ചും വിരിച്ച് കയറി വരുന്ന ചൈനീസ് ആർമി, നമ്മുടെ പാറക്കെട്ടുകൾക്ക് മേലേ ചൈനീസ് അക്ഷരങ്ങളും, ചൈനീസ് മുദ്രാവാക്യങ്ങളും എഴുതി വെച്ച്, മെയ്ഡ് ഇൻ ചൈന സിഗരട്ടും,  മെയ്ഡ് ഇൻ ചൈന ബ്രാണ്ടിക്കുപ്പികളും ഉപേക്ഷിച്ച് പുല്ലുപോലിറങ്ങിപ്പോകുന്നതാണ്. ചൈന കാണിയ്ക്കുന്ന ഈ അധിനിവേശം നോക്കി നിൽക്കാനേ ഇൻഡ്യൻ പട്ടാളത്തിന് കഴിയാറുള്ളു. എന്തെന്നാൽ, പാക്കിസ്ഥാനല്ല ചൈന. അവരോട് മുട്ടാൻ നമ്മൾ പലയാവർത്തി ജനിക്കേണ്ടിയിരിക്കുന്നു. 

ആ സത്യത്തിന്റെ ഭീകരതയെ ചെറുക്കാനാണ് ഇൻഡ്യൻ ഡിഫൻസ് അത്യന്താധൂനിക മിസൈലുകളും ആണവ അന്തർ വാഹിനികളും വികസിപ്പിച്ച് കൊണ്ടിരിക്കുന്നത്. നമ്മുടെ തല തകർക്കാൻ വരുന്നവന്റെ കുതികാൽ വെട്ടാനെങ്കിലും നമുക്ക് കഴിയും എന്ന ആത്മ വിശ്വാസം ഒരോ ഇൻഡ്യൻ പൗരനും, കൊടി മരത്തിൽ ജ്വലിക്കുന്ന ത്രിവർണ പതാകയെ സല്യൂട്ട് ചെയ്യാൻ പ്രേരിപ്പിക്കുന്നു

യുദ്ധം എപ്പോൾ വേണമെങ്കിലും ആർക്കെതിരേ വേണമെങ്കിലും ഉണ്ടാവാം. ഭായീ ഭായീ എന്നു പറഞ്ഞ് തോളിൽ കയ്യുമിട്ട് നടന്ന കാലത്താണ് ചൈന ഇൻഡ്യയെ ആക്രമിച്ചത്.  ഇന്നത്തെ കാലത്തെ ആക്രമണങ്ങൾ മുച്ചൂടും നശിപ്പിക്കാൻ വേണ്ടി മാത്രമുളള യുദ്ധങ്ങളാണ്. തങ്ങളുടെ ശാക്തിക, സാമ്പത്തിക മേൽക്കോയ്മയെ എതിരിടാൻ പോന്നവനെ നശിപ്പിക്കുക. യുദ്ധങ്ങളുടെ പിന്നിലുള്ള ചേതോവികാരം  പ്രാചീന കാലം തൊട്ട് അങ്ങനെ തന്നെയായിരുന്നെങ്കിലും അന്നത്തെ യുദ്ധങ്ങളും ഇന്നത്തെ യുദ്ധങ്ങളും തമ്മിലുളള വ്യത്യാസം, സാമ്രാജ്യത്ത പ്രവണത ഇന്ന് ഇല്ലാതായി എന്നതാണ്... ഒരു രാജ്യം പിടിച്ചടക്കി അവിടം സ്വന്തമാക്കി വെച്ച് ഭരിക്കാൻ ഇന്ന് രാജ്യങ്ങൾ താല്പര്യപ്പെടുന്നില്ല എന്ന് വന്നിരിക്കുന്നു.
അതുകൊണ്ട് തന്നെ, ഇൻഡ്യയെ പിടിച്ചടക്കേണ്ട കാര്യമൊന്നും ചൈനക്കില്ല. പിടിച്ചടക്കലും സാമ്രാജ്യത്ത ഭരണവുമൊക്കെ അസ്തമിച്ച് കഴിഞ്ഞു. അഫ്ഗാനിസ്ഥാനീന്നും ഇറാക്കീന്നും ഊരിപ്പോരാനാണ് അവിടം പിടിച്ചടക്കിയ അമേരിക്ക പോലും ആലോചിക്കുന്നത്.


ആണവ മിസൈലുകളുടെ കണ്ട്രോൾ ബട്ടണുകൾ ഒരോ രാജ്യത്തേയും അതാതു കാലത്തെ ഭരണാധികാരിയും സൈനീക മേധാവികളും ചേർന്ന് നിയന്ത്രിക്കുന്ന ഒന്നാണ്. അവയൊക്കെ പറന്നുയരാൻ അധികം സമയയം ആവശ്യമില്ല. ഇപ്പോൾ തന്നെ ഇൻഡ്യൻ അതിർത്തി പ്രദേശങ്ങളെയൊക്കെ ലാക്കാക്കാൻ പോകുന്ന മിസൈലുകളുടെ ശേഖരം പാക്കിസ്ഥാന്റെ കയ്യിലുണ്ട്. അവർക്ക് നേരിട്ടുള്ള ഒരു യുദ്ധത്തിൽ നമ്മുടെ രാജ്യത്തോട് പിടിച്ച് നിൽക്കാൻ ആവില്ല എന്ന ഘട്ടത്തിൽ, അവർ  നമുക്കെതിരേ അവയൊക്കെ, എന്തിന് ആണവായുധം പോലും പ്രയോഗിച്ച് കൂടാ എന്നില്ല. അവയുടെ നിയന്ത്രണം, നല്ലൊരു ജനാധിപത്യ ഭരണ കൂടത്തിന് പോലും സാധ്യതയില്ലാത്ത, പട്ടാളവും തീവ്ര വാദികളും ചേർന്ന് ഭരിക്കുന്ന ഒരു നിയന്ത്രണ സംവിധാനത്തിന് കീഴിലാണെന്നത് നമ്മെ സംബന്ധിച്ചിടത്തോളം ഡെമോക്ലീസിന്റെ വാളാണ്.

ലോകത്തെ ആയുധ ശക്തിയിൽ ഒന്നാമത് നിൽക്കുന്ന രാജ്യമാണല്ലോ അമേരിക്ക. ഭീക്ഷണിയ്ക്ക് മേൽ തലയും വെച്ച് ഉറങ്ങുന്നവർ എന്നൊരു ചിന്ത അവർ എപ്പോഴും കൊണ്ട് നടക്കുന്നു. അതു കൊണ്ട് തന്നെ എപ്പോഴും ഒരു ആക്രമണത്തിന് അവർ സന്നദ്ധരാണ്. തിരിച്ചടിക്കാൻ കരുതലുളളവരുമാണ്. അവരുടെ ആറ്റം-ന്യൂക്ലിയർ ബോംബുകളുടെ വിന്യാസത്തിന്റെ കാര്യം ചിന്തിച്ചാൽ ഒരു ലോകാവസാനം എന്ന് തന്നെ ഉറപ്പിക്കുന്നതാവും നല്ലത്.

അമേരിക്കൻ പ്രസിഡന്റ് ലോകത്ത് എവിടേക്ക് പോയാലും, എയർ ഫോഴ്സ് വൺ എന്ന അദ്ദേഹത്തിന്റെ ഔദ്യോഗിക വിമാനത്തിൽ ആണവ മിസൈലുകളുടെ കണ്ട്രോൾ ബട്ടണുകൾ അടങ്ങിയ ട്രങ്ക് പെട്ടിയും ഒപ്പം കാണും. ഈ മിസൈലുകളൊക്കെ പണ്ടേക്ക് പണ്ടേ, ലക്ഷ്യം നിർവചിക്കപ്പെട്ട് റെഡിയായിരുപ്പാണ്. എണ്ണം പറഞ്ഞ രാജ്യങ്ങൾക്ക് നേരേ.... അതിപ്പോ റഷ്യയോ, ചൈനയോ,  ഇൻഡ്യ തന്നെയോ, എന്തിന് എതോപ്യ പോലും ആകാം. തങ്ങളുടെ രാജ്യത്തിന് നേരേ ആക്രമണം ഉണ്ടാകാൻ പോകുന്നു എന്ന് വിവരം ലഭിച്ചാലുടനേ അമേരിക്കൻ പ്രസിഡന്റ് ആ പെട്ടിയിലെ ബട്ടണുകളിൽ വിരൽ അമർത്തുകയേ വേണ്ടു. അമേരിക്ക കത്തി അമരാൻ തുടങ്ങുന്നതിന് മുന്നേ ശത്രു രാജ്യം ലക്ഷ്യമാക്കി അവരുടെ ആണവ മിസൈലുകൾ പുറപ്പെട്ടിട്ടുണ്ടാവും. ഇതാണതിന്റെയൊരു കളി.
അതു കൊണ്ട്, ലോകത്തെ ഏതൊരു കിറുക്കൻ ഭരണാധികാരി വിചാരിച്ചാലും ഈ മിസൈലുകൾ പറന്നുയരാം. 
അങ്ങനെ സംഭവിച്ചാൽ, അടുത്ത ലോകമഹാ യുദ്ധമോ, അല്ലെങ്കിൽ മായൻ കലണ്ടറിലും മായമില്ലാത്ത [?] വേദ ഗ്രന്ഥങ്ങളിലും  പറഞ്ഞ് വിശ്വസിപ്പിച്ച ലോകാവസാനമോ ഉണ്ടാവുകയും ചെയ്യാം.


ഇൻഡ്യൻ ഉപഭൂഖണ്ടം ഒരു ആക്രമണ ഭീക്ഷണി നേരിട്ടാൽ, അമേരിക്ക സഹായിക്കും എന്ന് മൂഡമായി ധരിക്കുന്ന ഒരു ഭരണ നേത്രുത്വമാണ് നമുക്കിന്നുള്ളത്. ഇൻഡ്യയെ എന്നും സപ്പോർട്ട് ചെയ്തിട്ടുള്ളത് സോവിയറ്റ് യൂണിയനാണ്. അവരുടെ ആയുധങ്ങൾ ഏറ്റവും കൂടുതൽ വാങ്ങുന്നിടം തൊട്ട്, പ്രഖ്യാപിതമല്ലാത്ത ഒരു സൈനീക അച്ചുതണ്ട് പോലും  ഇൻഡ്യയ്ക്ക്, സോവിയറ്റ് യൂണിയനുമായുണ്ട്. പിന്നീട് സോവിയറ്റ് യൂണിയൻ പല പല റിപ്പബ്ലിക്കുകളായി ചിന്നി ചിതറിയിട്ട് പോലും,  ഇന്നത്തെ റഷ്യയും ഇൻഡ്യയും തമ്മിൽ ആ അടുപ്പം കാത്തു സൂക്ഷിക്കുന്നു.

ഇനിയത്തെ കാലത്തെ യുദ്ധങ്ങൾ ഏക പക്ഷീയമായ രണ്ട് രാഷ്ട്രങ്ങൾ തമ്മിലല്ല. നേരിട്ടും അല്ലാതെയും ഒരായിരം സഹായ ഹസ്തങ്ങൾ യുദ്ധത്തിലേർപ്പെടുന്ന രാജ്യങ്ങൾക്ക് തുണയായി കിട്ടും. ഇസ്രായേലിന്റെ ശക്തി അമേരിക്കൻ പിന്തുണയാണെങ്കിൽ, പാലസ്തീനെ സഹായിക്കാൻ അറബ് മുസ്ലീം രാഷ്ട്രങ്ങളുടെ നിര തന്നെയുണ്ട്. അതു പോലെ ചൈന ഇൻഡ്യയുമായി ഒരു യുദ്ധത്തിലേർപ്പെട്ടാൽ ഒന്നുകിൽ അമേരിയ്ക്കയ്ക്കോ, അല്ലെങ്കിൽ റഷ്യയ്ക്കോ അവരുടെ താൽപ്പരാർഥം ഇൻഡ്യയെ സഹായിക്കേണ്ടി വന്നേക്കാം.... കാരണം തങ്ങളെ കവിഞ്ഞ് മറ്റൊരുത്തൻ [ചൈന] സാമ്രാജ്യത്ത ശക്തിയായി തീരുന്നത് ഒരാൾക്കും സഹിക്കില്ലെന്നത് തന്നെ.


ഇങ്ങനെ നിരവധി കാരണങ്ങൾ ഉളളത് കൊണ്ട്, അഗ്നി പോലുളള മിസൈലുകളും, ലോകത്തിലേ എറ്റവും മികച്ച ആയുധ ശേഖരങ്ങളാലും നമ്മുടെ രാജ്യം കവചിതമായിരിക്കണം.  ലോക രാഷ്ട്രങ്ങളുടെ ചതുരംഗക്കളിയ്ക്കിടയിൽ നമുക്ക്  തന്ത്ര പരമായ ആക്രമണ ഭീക്ഷണി നേരിടുമ്പോൾ ഇൻഡ്യയ്ക്ക് അവരോട് ധൈര്യ പൂർവ്വം പറയാം..  ചെക്................
 




ടമാർ പടാർ:  
ഞാൻ ഉത്തര കൊറിയയുടെ ഒരു ആരാധകനാണ്. 
ഒന്നുമില്ലേലെന്താ, വയറ് നിറച്ചും ഉപരോധങ്ങളാണെങ്കിലെന്താ, തൊട്ടാ പണി കിട്ടും എന്ന് മറ്റുള്ളവരേക്കൊണ്ട് തോന്നിപ്പിക്കാൻ ഉത്തര കൊറിയയ്ക്ക് എപ്പോഴും കഴിയുന്നു. 
രാജ്യങ്ങളായാൽ അങ്ങനെ ആണായിപ്പിറക്കണം....